Almatyda búginen bastap jumysqa kirisken kásiporyndar sanitarlyq-epidemiologiialyq talaptardy qatań saqtaýy tiis, dep habarlaidy "Ult aqparat".
Búginnen bastap Almatyda ónerkásip kásiporyndary men qurylys nysandary, zańdy tulǵalarǵa arnalǵan HQKO-nyń qyzmeti qaita iske qosyldy.
«Bul kásiporyndarǵa sanitarlyq-epidemiologiialyq qaýipsizdikti qamtamasyz etý talaptary boiynsha aýdit júrgizildi. Tekserýdi Almaty qalasynyń Kásipkerlik jáne investitsiialar basqarmasy, taýarlar men kórsetiletin qyzmetterdiń sapasy men qaýipsizdigin baqylaý departamenti jáne «Atameken» UKP qyzmetkerlerinen qurylǵan jumys toby júrgizedi», - dep habarlady ákimdiktiń baspasóz qyzmeti.
Jumysy jandanǵan mekemeler jiti baqylaýǵa alynady. Únemi monitoring júrgiziledi. Eger buzýshylyqtar oryn alsa, kásiporynyń jumysyn toqtatý týraly sheshim qabyldanady.
Qaladaǵy barlyq ónerkásip jáne qurylys nysandaryndaǵy jumysshylardy COVID-19 qorǵaý boiynsha is-sharanyń tolyq tizimi jasaldy. Jumys berýshiler qatań sanitarlyq normalardy saqtaýǵa mindetti.
«Jumysqa kirispes buryn qyzmetkerler meditsinalyq tekserýden ótedi. Sonymen qatar, olardyń dene qyzýy teplovizor arqyly tekserilip, jýrnalǵa tirkeý qajet. Barlyq qyzmetkerler meditsinalyq maska, qolǵap, dezinfektsiialyq mailyqtar nemese antiseptikpen,sanitaizermen qamtamasyz etilýi tiis. Jinalystardy qysqartyp, adamdardyń kóp shoǵyrlanýyna jol berilmeýi kerek. Sonymen qatar, jumysshylar qashyqtyq normalaryn saqtaýy qajet. Ǵimarat ishi únemi dezinfektsiialanyp turýy shart», - dep atap ótti ákimdik.
Aita ketý kerek, jedel respiratorlyq infektsiialar (dene qyzýy, jótel, murynnyń bitelýi) jáne basqa da juqpaly aýrýlardyń belgisi bar qyzmetkerge jumys isteýge ruqsat etilmeidi. Bul jaǵdaida qyzmetkerdi dereý oqshaýlap, jedel járdem brigadasyn shaqyrýy kerek.
Tiisti aýdit júrgizgennen keiin kásiporyndardyń karantin jaǵdaiynda jumys isteýge daiyndyǵy týraly qorytyndy shyǵady. Sodan soń qyzmetkerler men kólik quraldary týraly málimetter infoalmaty.kz aqparat bazasyna engiziledi. Al, qalada jumysy jandanǵan kásiporyndardyń tizimin ákimdik saitynan qaraýǵa bolady.
