Almatyda jol airyǵyn salý úshin súriletin turǵyn úide turatyn 117 otbasyna ótemaqy tólendi, – dep habarlady «Ult aqparat».
Qala ákimdigi taratqan málimetke súiensek, birneshe jylǵa sozylǵan túitkildi másele qala ákimi Baqytjan Saǵyntaevtyń aralasýynan keiin sheshildi. Buzylýǵa jatatyn ýchaskelerdiń ieleri Almaty qalasynyń ákimi Baqytjan Saǵyntaevqa Jetisý aýdanynyń turǵyndarymen kezdesý kezinde kómek surap, ótinish bildirgen edi. Seifýllin dańǵyly men Jansúgirov kóshesiniń qiylysyndaǵy jolairyq respýblikalyq biýdjet esebinen salynyp jatyr.
Qala ákimi Baqytjan Saǵyntaev 29 qazanda memleket basshysy Qasym-Jomart Toqaevtyń qatysýymen ótken keńeste jol airyqtaryn salý úshin alynatyn ýchaskelerge ótemaqy tóleý máselesin kótergen bolatyn.
«Almaty qalalyq jer qatynastary basqarmasynyń basshysy Ardaq Samambetovtiń aitýynsha, Seifýllin dańǵyly men Jansúgirov kóshesiniń qiylysynda jolairyǵyn salý úshin ondaǵy jerdi satyp alý máselesi 2017 jyldan beri sheshilmei kelgen. Qarasha aiynda respýblikalyq biýdjetten 3,5 mlrd. teńge kóleminde qarajat bólinip, 117 ýchaskeniń ielerine ótemaqy tóleý protsesi bastaldy. Búginde olardyń barlyǵy tiisti somasyn aldy» delingen habarlamada.
«Osy kúnge deiin turǵyndardyń jaǵdaiy belgisiz bop keldi. Olar bul jerdi ne sata almaidy, ne kete almaidy. Qala ákimi Baqytjan Saǵyntaevtyń arqasynda másele sheshimin tapty. Buzylýǵa jatatyn úilerdiń ielerimen kóshýdiń qalai júrgiziletinin talqyladyq» dedi Almaty jer qatynastary basqarmasynyń basshysy Ardaq Samambetov.
Jylytý maýsymy men aldaǵy merekelerge bailanysty turǵyndarǵa kelesi jyldyń basynda kóshýge ruqsat berildi. Seifýllin dańǵyly men Jansúgirov kóshesiniń qiylysyndaǵy jol airyǵynyń qurylysy osy ýchaskedegi kólik júktemesin tómendetý maqsatynda júrgizilýde.
