25 jeltoqsanda Almatynyń "Baraholka" bazary aýmaǵynda jol apaty bolyp, eki adam qaza boldy, tórt adam jaralandy dep habarlady Almaty qalalyq politsiia departamentine silteme jasaǵan jergilikti aqparat quraldary.
"Eki kólik soǵylyp, "Lada" markaly jeńil kóliktiń júrgizýshisi men onda otyrǵan jolaýshy sol jerde kóz jumdy. Hyundai Click kóliginiń júrgizýshisi aýrýhanaǵa jetkizilgen. Taǵy úsh jolaýshy túrli dárejede jaraqat alyp, aýrýhanaǵa jatqyzyldy" delingen qalalyq politsiia departamenti taratqan habarlamada.
Jol apatyna bailanysty Qylmystyq kodekstiń 345-baby 4-tarmaǵy "("Jol-kólik erejelerin buzý") boiynsha qylmystyq is qozǵalǵan.
Eýropa odaǵy statistika qyzmetiniń dereginshe, Qazaqstan jol apaty kóp bolatyn álemdegi bes eldiń qataryna enedi. Kólik apattarynyń negizgi sebebi retinde jol erejesin saqtamaý jáne jol sapasynyń nasharlyǵy atalady.
Seisenbi, 24 jeltoqsanda ishki ister ministri Erlan Turǵymbaev ótken aptada júzden astam jol apaty tirkelip, 39 adamnyń qaza bolǵanyn málimdegen. Shamamen 160 adam jaralanǵan. Ministrdiń aitýynsha, jol apatynyń kóbeiýine negizinen qolaisyz aýa raiy jáne júrgizýshilerdiń jol erejelerin saqtamaýy sebep bolyp otyr.
