Almatyda qylmystyq ister jónindegi mamandandyrylǵan aýdanaralyq sotynda arnaiy operatsiia barysynda ustalǵan Qyrǵyzstan Jogorký Keneshiniń burynǵy depýtaty Damirbek Asylbekulyna qatysty basty sot otyrysy ótti, Bul týraly «QazAqparat» tilshisi habarlaidy.
Damirbek Asylbekulymen birge sot aldynda taǵy 11 adam jaýap berýde. Basty sot qaraýy barysynda 37 jastaǵy Damirbek Asylbekuly anketalyq málimetterinde óziniń Qyrǵyzstan azamaty ekenin, úilengenin jáne ustalǵan ýaqytqa deiin Bishkekte turǵanyn baiandady.
Memlekettik aiyptaý nusqasy boiynsha, 2016 jyldyń qarasha aiynda Asylbekuly Qyrǵyzstan Parlamentiniń depýtaty bola tura, qyzmet babyn asyra paidalanyp, materialdyq paida kórý, zańsyz aqsha tabý maqsatymen transulttyq uiymdasqan qylmystyq top quryp, ony basqarǵan. Top Qyrǵyzstannan Qazaqstanǵa jáne Reseige asa iri kólemde jetkizilip turǵan turmystyq tutyný zattarynyń ekonomikalyq kontrabandasymen ainalysqan.
Óz piǵylyn keden arqyly kórineý jalǵan málimetter jazylǵan qujattar arqyly júzege asyrǵan. Memlekettik aiyptaýdyń málimetinshe, eks-depýtat Qazaqstandaǵy dostaryna kontrabandamen birge ainalysýdy usynǵan. Uiymdasqan qylmystyq topty ózi basqaryp, qaramaǵyndaǵy adamdarǵa tapsyrmalar berip otyrdy.
Memlekettik aiyptaýshylardyń aitýynsha, kontrabandalyq taýardy Almaty qalasy boiynsha kedergisiz ótkizý úshin qylmystyq top úlken kólemde para berip kelgen.
Aita keteiik, sot protsesine Qyrǵyzstan Parlamentiniń músheleri tyńdaýshy retinde qatysty.
Eske salaiyq, aǵymdaǵy jyldyń aqpan aiynda QR Bas prokýratýrasy, QR Ulttyq qaýipsizdik komiteti jáne Sybailas jemqorlyqqa qarsy is-qimyl ulttyq biýrosy Almaty, Jambyl, Ońtústik Qazaqstan oblystary men Almaty qalasynda arnaiy operatsiia júrgizip, 30-ǵa jýyq adam ustaldy. Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondai-aq uiymdasqan qylmystyq top músheleri bar. Arasyndaǵy úsheýi Qyrǵyzstan azamaty. Onyń biri - Qyrǵyzstan Jogorký Keneshiniń depýtaty Damirbek Asylbekuly.
Keiin anyqtalǵandai, Damirbek Asylbekulynyń Qazaqstan azamattyǵy bar. Bul rette, sottalýshynyń ózi Qyrǵyzstan azamaty ekenin atap ótýde.
Almaty soty tergeý kezinde Damirbek Asylbekulyn qamaýda ustaý merzimin birneshe ret uzartqan bolatyn.
