Foto: egemen.kz
Almatyda 2024 jylǵy 23 qańtarda bolǵan jer silkinisi kezinde avtomattandyrylǵan habarlaý júiesi istemei qalyp, turǵyndarǵa eskertý habarlamasy ýaqytyly jetpegen. Qalalyq prokýratýranyń málimetinshe, tekseris barysynda eskertý júiesin satyp alý kezinde zańbuzýshylyqtar anyqtalǵan. Tergeý nátijesinde «TNS-INTEC» JShS bas direktory sapasyz jabdyq jetkizip, jalǵan aktiler arqyly biýdjet qarajatyn asa iri kólemde jymqyrǵany dáleldendi.
Bul is boiynsha Almaty garnizonynyń áskeri soty úkim shyǵardy.
Sot sheshimimen kompaniia basshysy men Almaty qalasy Tótenshe jaǵdailar departamenti basshysynyń úsh orynbasary, sondai-aq avtorlyq jáne tehnikalyq qadaǵalaý ókilderi qylmystyq jaýapqa tartyldy.
Tergeý materialdaryna sáikes, olar jabdyqty qabyldaý kezinde nemqurailyq tanytqan. Barlyq aiyptalýshy kináli dep tanylyp, bas bostandyǵynan aiyrý jáne memlekettik, kvazimemlekettik organdarda qyzmet etý quqyǵynan aiyrý jazasy taǵaiyndaldy.
Prokýratýra Almatydaǵy jer silkinisi kezindegi eskertý júiesiniń isten shyǵýyna osy zańbuzýshylyqtar sebep bolǵanyn atap ótti.
Aita keteiik, 2025 jylǵy 23 qazanda Almaty turǵyndaryna taǵy da jer silkinisine bailanysty eskertý habarlamasy jiberildi. Bul joly Qyrǵyzstan aýmaǵynda tirkelgen seismikalyq belsendilik Almaty turǵyndary men infraqurylymyna qaýip tóndirmegen.
