Almaty ákimi Baqytjan Saǵyntaevtyń tapsyrmasymen COVID-19 ekinshi tolqynyna daiyndyq aiasynda qalada balalar men qart adamdarǵa tegin profilaktikalyq tekserý júrgizilýde. Bul týraly №19 qalalyq emhananyń bas dárigeri Kámshat Aitqazina onlain brifing barysynda aitty, dep habarlaidy QazAqparat.
Kámshat Aitqazinanyń aitýynsha, qalada halyqtyń áleýmettik jaǵynan eń álsiz toptaryn tekserýmen qamtý týraly sheshimi qabyldanǵan. Birinshi kezekte, bul kóptegen sozylmaly aýrýy bar jasy úlken adamdar toby (65 jáne odan joǵary jastaǵy) jáne 16 jasqa deiingi balalar qamtylady.
Túrksib aýdanynda 7 meditsinalyq uiym jumyldyrylǵan, onda 242 081 adamǵa qyzmet kórsetiledi, onyń ishinde 16 jasqa deiingi 66 460 bala bolsa , 65 jastan asqan 20 918 adam bar. Dispanser esebindegi topta 15 543 eresek jáne 12 712 bala bar.
«Meditsinalyq uiymdarmen birinshi kezekte nysanaly toptar qurylyp, mýltidistsiplinarly komanda quramy bekitilip, arnaiy úige shaqyrtý boiynsha barý kestesi jasaldy», - dedi bas dáriger.
Osylaisha, 12 760 balany jáne 65 jastan asqan 11 700 adamdy tekserý josparlanǵan.
Onyń ishinde kópbalaly otbasylardan - 608 bala. Jalǵyz basty ana tárbiesindegi - 104 bala. Múmkindigi shekteýli - 415 bala bar.
«65 jastan asqan adamdardy tekserý úshin jalpy tájiribelik dáriger medbikesimen, nevropatolog, kardiolog, otolaringolog mamandar, balalar úshin pediatr dáriger, nevropatolog, okýlist, otolaringolog, balalar hirýrgi bar brigadalar quryldy. Patologiia anyqtalǵan jaǵdaida, patsientter esepke alynyp, densaýlyǵynda anyqtalǵan kemshilikke bailanysty, em taǵaiyndalady»,– dedi Kámshat Aitqazina.
Naýryz aiynan tamyzǵa deiin karantin shekteýi engizilgenin eskere otyryp, kóptegen naýqastar merzimdi dispanserlik tekserýden ýaqytyly óte almady, sol sebepti bir jaǵynan tolyqtai tekserý júrgizý, iaǵni, fliýrografiia, ish qýysy organdaryn jáne búirekti ýltradybystyq tekserý, jalpy qan taldaýy, jalpy zár taldaýy, qannyń biohimiialyq taldaýy, arteriia qysymy men kóz qysymyn ólsheý júrgizý josparlanǵan.
«Aýrý belgisi boiynsha qart adamdarǵa kúndizgi statsionarda, úi statsionarynda em taǵaiyndalady, sonymen birge, tegin dári jetkiziledi», - dep atap ótti K. Aitqazina.
Nysanaly top pen qaýipti toptaǵylar COVID-19 juqtyrýǵa áldeqaida beiim ekenin eskere otyryp, mýltidistsiplinarlyq toptar aqparattyq jumysqa erekshe nazar aýdarýda.
Budan basqa, halyqty koronavirýs infektsiiasynyń jeke jáne qoǵamdyq aldyn alý sharalary týraly aqparattandyrý emhanalardyń saitynda, áleýmettik jelide jáne qoǵamdyq orynda aqparat, beinerolik ornalastyrý arqyly júrgiziledi.
