Almaty ákimi Baqytjan Saǵyntaevtyń tóraǵalyǵymen ótken apparattyq keńeste jastar saiasatyn iske asyrý, onyń ishinde jumyspen qamtý, turǵyn úimen qamtamasyz etý jáne kámeletke tolmaǵandar arasynda qylmystyń aldyn alý máseleleri qaraldy, dep habarlaidy "Ult aqparat".
Byltyr «Eńbek» memlekettik baǵdarlamasy boiynsha 25 313 jas jumysqa ornalasty. Onyń ishinde turaqty jumys oryndaryna – 10 740, qoǵamdyq jumystarǵa – 7 142, «Jastar tájiribesi» baǵdarlamasy boiynsha – 1 503, áleýmettik jumys oryndaryna – 361, «Jumyspen qamtýdyń jol kartasy» boiynsha – 4 027 jas jumyspen qamtyldy. «Bastaý biznes» jobasy boiynsha 858 jas kásipkerlik negizderin oqydy, 448 jasqa granttar berildi, 234 jas qysqa merzimdi kýrstarda bilimderin jetildirdi.
«Self-Made» áleýmettik joba aiasynda 50 ulttyq jáne jeke kompaniialarmen, sondai-aq memlekettik organdarmen taǵylymdamadan ótý týraly memorandýmdarǵa qol qoiyldy. Kolledjderdiń 150 úzdik túlegi tájiribeden ótti.
Budan ózge, kásiptik-tehikalyq bilim beretin 43 mekemeniń 5 myńǵa jýyq stýdenti qalanyń 351 kásipornynda 38 mamandyq boiynsha dýaldy oqýmen qamtyldy. Kolledjderdiń materialdyq-tehnikalyq jabdyqtalýyn nyǵaitý jáne jańartý boiynsha jumystar jalǵasýda.
Ótken jyldan bastap jastardy qoldaý sharalary týraly qoljetimdi aqparatpen keńirek qamtý maqsatynda barlyq aýdandarda «Almaty jastary» jastar resýrstyq ortalyqtary jumys isteýde. Olarda HQKO qaǵidaty boiynsha jumyspen qamtý, turǵyn úi alý, kásipkerlikti damytý máseleleri boiynsha tegin keńester beriledi. Munda «Atameken» UKP-nyń, Halyqty jumyspen qamtý ortalyǵynyń jáne «Otbasy bankiniń» qyzmetkerleri túrli konsýltatsiialar beredi. Resýrstyq ortalyqtarǵa júgingen 300-den astam jas «Eńbek» memlekettik baǵdarlamasy boiynsha jumysqa ornalasty. 8 myńǵa jýyq adam keńes aldy.
Osyǵan orai, Almaty ákimi Baqytjan Saǵyntaev jastardy qoldaý máselelerine, ásirese olardy jumysqa ornalastyrýǵa erekshe nazar aýdarýdy tapsyrdy. Bul damýdyń jol kartasyn iske asyrýǵa jáne qala jastaryn qoldaýǵa qatysatyn barlyq aýdandar ákimderiniń jáne basqarmalar basshylarynyń basty mindetteriniń biri.
Keńes barysynda jastardyń demalysyn durys uiymdastyrý, qosymsha bilim berý, turǵyn úimen qamtamasyz etý máseleleri qaraldy. Máselen, «Nurly jer» turǵyn úi baǵdarlamasy aiasynda jastardyń jáne jas otbasylardyń qoljetimdi baspana máselesin sheshý úshin qalada jumys isteitin jastarǵa satyp alý quqyǵynsyz 5 jyl merzimge jalǵa beriletin turǵyn úi berýdi jalǵasýda. 2019-2020 jyldary osy baǵdarlama boiynsha 1400 páter bólindi. Biyl taǵy 1050 páter úlestirý josparda. Budan bólek, «Almaty jastary 3.0» qalalyq baǵdarlamasy boiynsha 1 myń jas baspanaly boldy.
Kámeletke tolmaǵandar arasyndaǵy qylmysty eskertý erekshe nazarda, atap aitqanda, nashaqorlyqtyń aldyn alý máseleleri. Sońǵy 3 aida politsiia departamenti osy salada 258 quqyq buzýshylyqtyń jolyn kesti.
Megapolis ákiminiń tapsyrmasyna sáikes, Politsiia departamenti bilim berý jáne Qoǵamdyq densaýlyq basqarmalarymen birlesip, kámeletke tolmaǵandar arasyndaǵy quqyq buzýshylyqty anyqtaý jáne onyń jolyn kesý boiynsha jumys turaqty júrgizýleri tiis.
Keńesti qorytyndylaǵan Baqytjan Saǵyntaev aýdan ákimderi men basqarma basshylaryna jastar ótinishteriniń sheshilýin únemi baqylaýda ustaýdy tapsyrdy. Bul jumystyń tiimdiligin arttyrý úshin Almaty ákiminiń orynbasary Erjan Babaqumarovtyń basshylyǵymen úilestirý toby quryldy. Sonymen qatar, 2025 jylǵa deiingi damýdyń jol kartasy men jastarǵa qoldaý kórsetý ózektendiriletin bolady.
