Almatyda 2023 jyly jastar teatrynyń qurylysy bastalady. Bul týraly qala ákimi Erbolat Dosaev Almaty qalasy máslihatynyń kezekten tys HHHI sessiiasynda aitty, dep habarlaidy QazAqparat.
«Qazaqstannyń halyq ártisi Asanáli Áshimovtyń usynysy boiynsha kelesi jyly megapoliste jastar teatry salynady. Smetalyq-jobalaý qujattamasy men orny daiyn bolǵan soń qurylysyn bastaimyz», - dedi qala ákimi.
Onyń aitýynsha, Almatyny - mádeni astana retindegi mártebesin nyǵaitý basty mindetterdiń biri.
«Ol úshin Almatynyń 2025 jylǵa deiingi damý baǵdarlamasy sheńberinde kelesi jyly qoldanystaǵy mádeniet obektilerin jańǵyrtýǵa jáne jańa mádeniet obektilerin salýǵa, ári mádeni-buqaralyq is-sharalardy ótkizýge nazar aýdaramyz. Máselen, 2023 jyly mádeniet obektileriniń infraqurylymyna erekshe nazar aýdarylatyn bolady, búginde olardyń 70 protsenti tozǵan», - deidi Erbolat Dosaev.
Halyqaralyq standarttarǵa sáikes qala turǵyndary men týristerdi tartý ortalyǵyna ainaldyrý maqsatynda Almaty haiýanattar baǵyn kezeń-kezeńmen rekonstrýktsiialaýdy bastaý josparlanýda.
Buǵan qosa, 2 mlrd teńgege «Alataý» dástúrli óner teatryna kúrdeli jóndeý jumystaryn júrgizemiz. Qýyrshaq teatryn, qalalyq arhivti jańǵyrtý jáne kitaphanalardy tsifrlandyrý bastalady. «Sonymen qatar, biyl Qazaq memlekettik tsirkiniń ǵimaratyn jańǵyrtýǵa, qazaq zaǵiptar qoǵamy men qazaq sańyraýlar qoǵamy úshin mádeniet úiiniń jańa ǵimaratyn salýǵa jobalaý-smetalyq qujattama daiyndadyq. Bul maqsatqa qosymsha qarajat bólinedi»,- dedi qala basshysy.
