Foto: Turar Qazanǵapov, Tengrinews.kz
Almatydaǵy jappai tártipsizdik kezinde ortalyqqa jaqyn ornalasqan 37 páterdi buzaqylar búldirip ketken. Bul týraly qala ákimi Baqytjan Saǵyntaevtyń qatysýymen ótken shuǵyl shtab otyrysynda belgili boldy, dep habarlaidy QazAqparat.
«Búginge deiin 37 páterge tekseris júrgizildi. Qazir mamandar qansha shyǵyn kelgenin eseptep jatyr. Buǵan birneshe kún qajet. Biz ol týraly PIK pen turǵyndarǵa habarlaimyz, óitkeni aldaǵy eki kúnde tergeý amaldary júrgiziledi», - dedi qala ákiminiń orynbasary Muhit Ázirbaev.
Buǵan deiin Almaty ákimdigi ǵimaratyna kelgen shyǵyn týraly jazǵan bolatynbyz.
Aldyn ala esep boiynsha, shyǵyn kólemi - 112,6 mlrd teńge. Onyń 67 mlrd teńgesi biznes sýbektilerine tiesili.
Almatydaǵy búlikten keiin 240 nysan zardap shekti. Basym bóligi esik-terezesin aýystyrýdy qajet etedi jáne jartylai órtengen nysandar bar.
