Qaznet qoldanýshylary Almatydaǵy iri jol apatyn talqylap jatyr. Video tanymal Instagram-pablikterde jariialandy, - dep habarlaidy Tengrinews.kz agenttigi.
Kadrlarǵa qaraǵanda, Toyota Corolla kóligi Jubanov kóshesiniń boiymen asqan jyldamdyqpen kele jatqan jáne qarsy jolaqqa shyqqan. Keiin osy kezede baǵdarshamda turǵan Mazda kóligine bar jyldamdyqpen kelip soqtyǵysqan. Soqqynyń kúshti bolǵany sonsha, Mazda kóliginiń saý-tamtyǵy qalmaǵan. Mazda júrgizýshisi oqiǵa ornynda qaza boldy.
Toyota kóliginiń júrgizýshisi 74 jastaǵy zeinetker bolǵan. Qaza bolǵan Mazda júrgizýshisi - 51 jasta. Bul týraly Almaty politsiiasy habarlady.
"Biyl 6 qarashada saǵat 14:25-te júrgizýshi, 1948 jyly týǵan P. Jubanov kóshesimen batys baǵytta Toyota Corolla markaly kóligimen kele jatyp, 1971 jyly týǵan A. esimdi er adam tizgindegen Mazda markaly avtokólikpen soqtyǵysqan. Osy JKO saldarynan Mazda avtokóliginiń júrgizýshisi oqiǵa ornynda qaza boldy", - dedi Almaty qalasy PD anyqtaý basqarmasynyń bastyǵy politsiia podpolkovnigi Oljas Sháripov.
"Toyota Corolla" avtokóligi júrgizýshisiniń jasyn, sondai-aq onyń saý jáne jol-kólik oqiǵasy bolǵan jerden ketpeýin eskere otyryp, oǵan qatysty qamaýǵa alýmen bailanysty emes bultartpaý sharasy tańdaldy", - dedi Oljas Sháripov.
Derek Qazaqstan Respýblikasy Qylmystyq kodeksiniń 345-babynyń 3-bóligi boiynsha sotaldy tergep-tekserýdiń biryńǵai tizilimine tirkelgen.
