Almatyda janarmai quiý stantsiiasynyń 3 qyzmetkeri eseptegish quraldyń málimetterin bilý úshin qudyqqa túsip, ýlanyp qaldy, dep habarlaidy "Ult aqparat".
Bul týraly aqparat sonymen qatar Instagram jelisinde de paida boldy.
Almaty qalasynyń Tótenshe jaǵdailar departamentiniń baspasóz qyzmeti 27 sáýir kúni saǵat 18:37-de Almaty qalasy Tótenshe jaǵdailar departamentiniń «112» nómirli pýltine Medeý aýdany Nurmaǵambetov kóshesi 148/2 meken-jaiy boiynsha janarmai quiý stantsiiasynyń aýmaǵynda ornalasqan qudyqqa eseptegish quraldaǵy málimetterdi bilý úshin janarmai stantsiiasynyń 3 qyzmetkeri túsip, belgisiz gazdan ýlanǵanyn habarlady.
«Habardy alysymen oqiǵa ornyna qalanyń shuǵyl áreket etýshi qyzmet ókilderi attandy. Olar: «109 qutqarý qyzmeti», Respýblikalyq jedel qutqarý jasaǵy, jedel meditsinalyq qyzmettiń 3 brigadasy, Medeý aýdanynyń tótenshe jaǵdailar basqarmasy men Politsiia departamentiniń ókilderi. Qutqarý jumystarynyń barysynda zardap shekken 3 azamatty qudyqtan alyp shyqty», - delingen TJD málimetinde.
Sondai-aq málimette 3 adamnyń jaqyn aradaǵy kópsalaly klinikalyq aýrýhanaǵa jetkizilgeni aitylǵan. Zardap shekkenderge qajetti barlyq kómekter kórsetilip jatyr. Jaǵdai shuǵyl qyzmet ókilderiniń baqylaýynda. Bolǵan oqiǵanyń sebep-saldary anyqtalý ústinde.
