Foto: Tatler Asia
2025 jyldyń 9 qyrkúieginde Almatyda kásipker, ári metsenat, kollektsioner Nurlan Smaǵulov negizin qalaǵan Almaty Museum of Arts zamanaýi óner mýzeii ashyldy, dep habarlaidy Ult.kz.
Almaty Museum of Arts-tyń missiiasy – zamanaýi óner úderisterin qoldaý jáne zertteý, olardyń álemdik mádeniettegi mańyzyn ashý. Mýzei qoryna Qazaqstannan jáne basqa da elderden jinalǵan 700 óner týyndysy endi.
Mýzeidiń kórkemdik strategiiasy men baǵdarlamalyq mazmunyn kórkemdik jetekshi Merýert Qalieva ázirleidi. Mýzeide eki joba ashyldy. Onyń biri – «Qonaqtar» atty mýzeidiń óz kollektsiiasy qoiylǵan kórme jáne qazaqstandyq sýretshi Almagúl Meńlibaevanyń «Men bárin túsinemin» atty retrospektivalyq ekspozitsiiasy.
Mýzeidiń ashylý saltanatyna QR Mádeniet jáne aqparat ministri Aida Balaeva, Almaty qalasynyń ákimi Darhan Satybaldy, mýzeidiń negizin qalaýshy Nurlan Smaǵulov, sondai-aq óner salasy jáne BAQ ókilderi qatysty.
Is-shara barysynda Aida Balaeva bul mýzei ónerdi, zamanaýi tehnologiialardy, mýltimediialyq sheshimder men kreativti indýstriia quraldaryn biriktiretin jańa mádeni bastama ekenin atap ótti. Ministr Prezident Qasym-Jomart Toqaevtyń joldaýynda aitqan sózderin eske salyp, qazaqstandyq jas urpaq úshin patriotizmniń basty kórsetkishi jasampazdyq pen jańashyldyqta ekenin jetkizdi. Ol úlgi retinde kásipker ári metsenat Nurlan Smaǵulovtyń elge etken qyzmetin atap ótti.
«Bul mýzei tek ónerdi tamashalaý alańy emes, shyǵarmashylyq oidyń, jańa ideialar men halyqaralyq dialogtyń ortalyǵyna ainalatynyna senemin. Mýzei Almatynyń mádeni ómirin baiytyp, Ortalyq Aziia ónerin halyqaralyq deńgeide damytýǵa zor úles qosady», – dedi Aida Balaeva.
Jalpy aýmaǵy 10 myń m²-den asatyn mýzei ǵimaratyn britandyq Chapman Taylor sáýlet biýrosy jobalaǵan. Birinshi qabatta keń kórme zaldary ornalasqan, sonyń ishinde «Uly dala» jáne «Saryarqa» zaldary bar. Ortalyq keńistik Art Street atriýmyna berilgen, ol Sharyn shatqalynyń tabiǵi pishinderin beineleidi.
Sondai-aq munda kásibi qor saqtaý orny, restavratsiialyq ortalyq jáne «Sheberhana» atty kreativti keńistik ornalasqan.
Mýzei kollektsiiasynyń 70%-dan astamy HH ǵasyrdyń kórnekti qazaqstandyq sýretshilerdiń eńbeginen turady. Atap aitsaq, Jańatai Shárdenov, Toqbolat Toǵyzbaev, Maqym Qisamedinov jáne Shaimardan Sarievtiń shyǵarmalary qoiylǵan. Sondai-aq qazaqstandyq zamanaýi ónerdiń negizgi tulǵalary atanǵan Rústem Halfin, Saýle Súleimenova jáne Said Atabekovtiń jumystary da bar. Bolashaqta mýzei óz kollektsiiasyn tolyqtyryp, maqsatyn jalǵastyra bermek. Murajai Qazaqstan men Ortalyq Aziia aimaǵyndaǵy ónerdi usyný jáne zertteý jáne halyqaralyq deńgeide tanytýdy maqsat etedi.
Mýzei 12 qyrkúiekten bastap óz qyzmetin bastaidy.
