QR Memlekettik Á. Qasteev atyndaǵy óner mýzeiinde Jambyl Jabaevtyń týǵanyna 175 jyl tolýyna arnalǵan «Baqyt týraly jyr» atty mereitoilyq kórme ashyldy, dep habarlaidy "Ult aqparat".
Kórmege Á. Qasteev atyndaǵy óner mýzeii qorynan alynǵan 30-dan astam keskindemelik, grafikalyq jáne músindik týyndylary qoiyldy.
«Kórmede Jambyl beinesin jazǵan qylqalam sheberleriniń týyndylary, onyń ómiriniń keń tanylǵan, sońǵy on jylyn kóbirek qamtyǵan. Jambyldy ómirde óz kózimen kórip, beinelegen sýretshilerdiń biri, B.Chekalin, Á. Qasteev, R. Ardatov, N. Iagodkin. B. Chekalin úshin Jambyl týyndylary kúndelikti ómirimen ushtasyp jatty, keiipkerdiń árbir sátterin kózden tasa jibermei beineleýge tyrysty. B.Chekalinniń Jambyl taqyrybyndaǵy eńbekterin uly jyraýdyń ómir jolyn baiandaityn keń kólemdi monografiia desek te bolady. Á. Qasteev, Jambyl beinesine birneshe ret toqtalǵan, aqynǵa arnap «Halyq aqyny Jambyldyń portreti» (1937), «Jambyl dostary arasynda» (1971) atty týyndylaryn jaryqqa shyǵardy. Á. Qasteev Jambyldy qansha ret beinelese, sonsha ret birin-biri qaitalamaityn kelbet jasady. Ol ótken eńbekterin qaitalamaý úshin aqynyń psihologiialyq ishki jan dúniesiniń alýan qyryn asha bilgen», - deidi kórme jetekshisi Laýra Ábildaeva.
R. Ardatovtyń «Jambyl áni» (1940), Á. Ysmaiylovtyń «Dostyq áni» (1972) týyndylarynda Jambyldy kóp tulǵalyq kompozitsiianyń ortańǵy bóligine ornalastyrǵan. Sýretshiler osyndai kompozitsiialyq sheshim arqyly, ózderiniń týyndylaryndaǵy aqyn obrazyn eldiń oiyn, muń-muqtajyn óz óleńderinde jyrlaityn halyqtyń adamy degen oidy bildiredi.
Keskindemelik portret janrynda A. Rittih, A. Cherkasskii, G. Ysmaiylova syndy sýretshilerdiń jazǵan Jambyl beinesinen danalyqtyń, meiirim men zerdeliktiń, tabandylyqtyń nyshandary baiqalady.
«Grafikalyq portret janrynda, N. Krýtilnikovtyń 1957 jyly akvarelmen jazǵan Jambyldyń júzindegi árbir syzyqtarǵa deiin anyq jáne tabiǵi jetkizilgen. Jambyl oily, ornyqty, jinaqy, ashyq janary zerdeli bolyp kórinedi. Al, N. Gaev, A. Zakvoriashinniń týyndylaryndaǵy aqynnyń qatqyldaý oily júzinen ótkenniń ótkir bolmysyn kórsetkendei.1983 jyly Á. Qasteev atyndaǵy óner mýzeiiniń qoryna Ýkrainanyń Sýmy qalasynan N. Iagodkinniń 1939 jáne 1940 jyldary akvarelmen jazylǵan eki portreti tústi. Týyndylarda boiaý tústeri názik, árbir usaq detaldardy uqyptylyqpen beinelegen.Uly otan soǵysy jyldaryndaǵy Jambyldyń shyǵarmashylyǵynyń shyńyna ainalǵan «Leningradtyq órenderim» atty óleńin T. Govorova óziniń seriialyq linograviýralarynda kórsetti» - deidi Laýra Ábildaeva.
«Baqyt týraly jyr» kórmesinde ár túrli ult pen tarihi kezeńdegi keskindemeshilerdiń, grafikterdiń jáne músinshilerdiń shyǵarmalary «HH ǵasyrdyń Gomeri» Jambyl Jabaiulynyń epikalyq beinesin óz shyǵarmalarynda naqtyly túrde kórsetýge umtylǵan biriktirilgen týyndylary usynylǵan.
