Foto: ashyq derekkóz
Qarjylyq monitoring agenttiginiń (QMA) Almaty qalasy boiynsha departamenti «PokStars» jáne «LuckyShark» atty zańsyz onlain-qumar oiyndaryn uiymdastyrǵan tulǵalar tobyna qatysty tergeýdi aiaqtady, dep habarlaidy Ult.kz.
Tergeý málimetinshe, stavkalar bank arqyly qabyldanyp, keiin oiynshylarǵa júiege kirý úshin login men qupiiasóz berilgen. Qarjylyq operatsiialar týystary men úshinshi tulǵalardyń, sonyń ishinde shetel azamattarynyń (dropperlerdiń) atyna rásimdelgen bank kartalary arqyly júrgizilgen.
Jańa oiynshylardy tartý úshin uiymdastyrýshylar áleýmettik jelilerde nysanaly jarnama arqyly oiyn klýbyn belsendi túrde jarnamalaǵan.
Sot úkimimen úsh kináli tulǵa 2 jyl 6 aidan 4 jyl 6 aiǵa deiingi merzimge bas bostandyǵynan aiyryldy. Sonymen qatar memleket paidasyna 116 million teńge kólemindegi zańsyz tabys pen “ZEEKR” markaly avtokólik tárkilendi. Úkim zańdy kúshine endi.
QMA málimetinshe, agenttik zańsyz oiyn biznesin anyqtaý jáne jolyn kesý boiynsha júieli jumystardy jalǵastyrýda.
Sońǵy eki jyl ishinde:
🔹 105 sotqa deiingi tergeý tirkelgen;
🔹 22 jasyryn kazino men 65 oiyn zaly, 441 terminal joiylǵan;
🔹 «Kiberbaqylaý» júiesi arqyly 33 myńnan astam onlain-kazino siltemesi buǵattalǵan;
🔹 zańsyz oiyn biznesin uiymdastyrǵany úshin 166 adam sottalǵan.
Agenttik azamattardy kúdikti onlain-oiyndar men qarjy alaiaqtyqtary týraly 1458 nómirli call-ortalyqqa habarlaýǵa shaqyrady.
