Foto: Almaty ákimdigi
Almatyda qaldyq óńdep, elektr qýatyn óndiretin zaýyt salý jobasy qurylys-montaj jumystaryna daiyndyqtyń sońǵy kezeńine jetti, dep habarlaidy Ult.kz.
Joba Alataý aýdanynda qytailyq Junxin Environmental Protection kompaniiasynyń qatysýymen qolǵa alynǵan. Investitsiia kólemi 280 mln AQSh dollarynan asady (shamamen 130 mlrd teńge).
Kásiporynnyń qýaty táýligine 2 myń tonnaǵa deiin qaldyq óńdeýge jetedi, qalanyń energetikalyq júiesine 60 MVt-qa deiin elektr qýatyn óndiredi.
Qazirgi kezeńde daiyndyq jumystary aiaqtaldy: Qazaqstan Respýblikasy Ekologiia jáne tabiǵi resýrstar ministrligimen investitsiialyq kelisim jasalyp, qaldyq jetkizý jáne óndiriletin elektr qýatyn energojúiege berý boiynsha negizgi kelisimder bekitildi.
Joba halyqaralyq ekologiialyq standarttarǵa sáikes keletin zamanaýi avtomattandyrylǵan gaztazartý júielerimen jabdyqtaýdy kózdeidi.
Qurylys kezeńinde shamamen 700 jumys orny ashylady, al nysan paidalanýǵa berilgennen keiin 120-ǵa jýyq turaqty jumys orny qurylmaq.
Atalǵan jobany júzege asyrý poligondarǵa túsetin júktemeni azaityp, qaldyq kólemin qysqartýǵa jáne olardy qaita óńdeý arqyly qosymsha elektr qýatyn óndirýge múmkindik beredi.
Eske sala keteiik, 2025 jyly 29 tamyzda Qazaqstan Respýblikasy Ekologiia jáne tabiǵi resýrstar ministrligi men Junxin Environmental Protection kompaniiasy arasynda Almaty qalasynda elektr qýatyn óndiretin qoqys óńdeý zaýytyn salý jónindegi investitsiialyq kelisimge qol qoiylǵan bolatyn. Atalǵan kompaniia «jasyl» energetika jáne qaldyq óńdeý salasyndaǵy iri operatorlardyń biri sanalady, 455 patentke ie jáne osy baǵyttaǵy jobalardy júzege asyrýda mol tájiribesi bar.
