Almatyda VIP-saýnanyń direktory, qyzmetkerleri men klientteri ákimshilik jaýapkershilikke tartyldy, - dep habarlaidy QazAqparat.
Tótenshe jaǵdai kezinde jumys istegen saýnany Áýezov aýdanynyń Politsiia basqarmasynyń qyzmetkerleri áshkerelegen bolatyn.
Keshenniń ákimshilik direktory, bas esepshi, eki massajist, eki kelýshi, sondai-aq er adamdarǵa intimdik qyzmet kórsetken eki áiel ákimshilik jaýapkershilikke tartyldy.
«Biz beinekadrdy muqiiat zerttep, karantin kezinde monsha kesheni 2 ret ashyq bolǵanyn anyqtadyq. Keshenge kelgen azamattardy taptyq, tótenshe jaǵdaidy buzǵany úshin árqaisysy QR ÁQbK-niń 476-baby boiynsha ákimshilik jaýapkershilikke tartyldy. Ótken túnde olardyń ekeýi mamandandyrylǵan aýdanaralyq ákimshilik sotynyń sheshimimen ákimshilik qamaýǵa alyndy. Qalǵan quqyq buzýshylarǵa qatysty sheshim búgin qabyldanady», – dedi Áýezov aýdandyq Politsiia basqarmasynyń basshysy Álisher Tursynbetov.
Onyń aitýynsha, saýnanyń 56 jastaǵy qojaiyny qazir politsiiadan boi tasalap júr.
«Biraq erte me, kesh pe ol anyqtalyp, jaýapqa tartylady. Biz taǵy da azamattardy zańdy qatań saqtaýǵa jáne qoǵamnyń qaýipsizdigine baǵyttalǵan karantindi buzbaýǵa shaqyramyz», – dedi Tursynbetov.
