Áleýmettik jelidegi ekiudai mándegi jazbalarymen tanymal qazaqstandyq MMA sportshysy Qýat Hamitov Almatydaǵy búlik kezinde qalai ustalǵanyn aityp berdi, dep habarlaidy Sputnik Qazaqstan.
Ol "batystyq baýyrlaryn qoldaý úshin" beibit mitingige shyqqanyn jetkizdi.
"Biz balalarmen birge janarmai beketine jinaldyq. Eshkim eshteńeni buzǵan joq, eshteńege tiisken joq. Halyq jinala bastaǵan kezde politseiler, politsiia bólimderiniń, qala ákiminiń orynbasary, prokýratýra ókilderi keldi. Olardyń barlyǵy mitingtiń beibit túrde ótkenin kórdi, eshkim eshkimdi soqqyǵa jyqqan joq. Biz ol jerde shamamen 5-6 saǵat boldyq. Memleketke qandai talap qoiatynymyzdy aityp, beineúndeý jazdyq. Bul negizinen azyq-túlik, benzin, gaz baǵasy kóterilmesin degen talap boldy. Memleket jaǵdaidy baqylaýǵa alyp, baǵany kótergender óz ornyn bosatýyn suradyq.
Árine, daý-damaisyz bolmady. Shamam kelgenshe qorǵadym. Politsiia, prokýratýra, memlekettik organ qyzmetkerine birde-bir narazylyq bildirýshi saýsaǵynyń ushyn da tigizgen joq. Biz bárin óte beibit ótkizdik. Sońynda aqsaqal shyǵyp, bata berip, biz tarai bastadyq.
Men ol jerden shyǵyp ketkende ákimniń orynbasary maǵan qońyraý shalyp, halyqty tynyshtandyrýǵa kómektesýimdi ótindi. Óitkeni onyń aitýynsha, adamdar meni tyńdaidy, qurmetteidi. Men "Halyq arenaǵa" baryp, jiylǵandarmen sóilesýdi jón kórdim.
Halyq meni qurmetpen qarsy alyp, sóz berdi. Biz óz-ózimizge jaý emespiz, elimizdi jaǵyp, qiratyp, órteýdiń keregi joq. Biz batys óńirdi qoldaý úshin jáne memleket bizdi estýi úshin jinalyp jatyrmyz dedim. Qazir joldy jappaiyq, jedel járdem bar, jumystan kele jatqan halyq bar, jurtty shoshytpai, myna joldan keteiik. Basqa bir jerge baryp aitatynymyzdy aitaiyq dep halyqty sol jaqtan alyp ketken bolatynmyn.
Munyń bári aiaqtala salysymen, men úige qaittym. Osy kúnderi úide, qala syrtynda boldym. Bul kúnderi internet pen bailanys bolmady", - dedi ol.
Sportshy bir-eki kúnnen keiin UQK qyzmetkerleri dosy arqyly ózimen bailanysqa shyqqanyn aitty.
"Olar "nege qashyp kettiń?" dep surady. Men eshqaida qashpaǵanymdy túsindirdim. Bailanys bolmaǵandyqtan, telefonym sónip turǵanyn aittym", - dedi Hamitov.
Áńgimelesý úshin UQK ǵimaratynda kezdesemiz dep kelisken.
Alaida, ol UQK-ge barǵysy kelgende, oǵan arnaiy qyzmet ókilderi kirip, jaǵdaidy túsindirmei ustap alyp ketkenin aitty. Sondai-aq, ol qyzmetkerler ákesin avtomatpen bir urǵanyn jetkizdi. Odan bólek Qýat Hamitov politsiiada soqqyǵa jyǵylǵanyn alǵa tartty. Onyń kesirinen politsiia qyzmetkerleri qaza tapqanyn jáne zardap shekkenin aitty dedi. Biraq degenmen sportshy bosatyldy. Ol janarmai beketindegi miting kezinde bilik ókilderin kópshilikten qorǵaǵanyn atap ótti.
"Men taǵy bes jyl sporttaǵy kareramdy jalǵastyrýdy, eldiń namysyn qorǵaýdy josparlaǵan edim. Biraq bul jaǵdaidan keiin, árine, quqyq qorǵaý organdarynyń qatysýynsyz bolmady. Men kareramdy aiaqtaýdy sheshtim. Meniń ómirimde jańa taraý, jańa karera bastalady", - dedi Qýat Hamitov.
Mitingiler bastalǵan kezde 33 jastaǵy MMA sportshysy, úsh dúrkin álem chempiony Qýat Hamitov narazylyq bildirýshilerge qoldaý bildirdi. Buǵan deiin ol respýblikada bolyp jatqan jaǵdaiǵa óziniń narazylyǵyn birneshe ret bildirgen, atap aitqanda, birqatar antikovidtik sharaǵa qarsy bolǵan. Ol "dezinfektsiialaýshylardy urýǵa" shaqyrǵany úshin alty aiǵa bas bostandyǵyn shekteý jazasy qoldanyldy.
Bir jyl buryn Qýat Hamitov "Birtutas Qazaqstan" partiiasyn qurdy.
