Búgin Almaty áýejaiy mańynda áskeri ushaq apatqa ushyrady. Rastalǵan málimet boiynsha, áskeri ushaq apatynan 4 adam qaza taýyp, zardap shekken 2 adam Almaty qalasyndaǵy №4 qalalyq klinikalyq aýrýhanaǵa jetkizildi. Ekeýi de jansaqtaý bóliminde jatyr, - dep habarlaidy «Ult aqparat».
«Búgin 17:20-da «Nur-Sultan-Almaty» baǵytynda ushyp shyqqan UQK áýe qyzmetiniń AN-26 ushaǵy apatqa ushyrady. Birden dabyl qaǵyldy. Oqiǵa ornyna apattyq qutqarý jasaǵy shuǵyl attandy.
Aldyn ala taralǵan aqparatqa sáikes, bort ushý-qoný jolaǵynyń bas jaǵynda qulaǵan», - dedi áýejaidan.
Atalǵan apat saldarynan reister bógelýde. Áýejaidyń baspasóz qyzmeti Almatydan Aqtaýǵa, Nur-Sultanǵa, Kókshetaý men Oralǵa júretin reister bógelgenin rastady.
QR Tótenshe jaǵdailar ministrliginiń baspasóz qyzmetiniń habarlaýynsha, áskeri ushaq qulaǵan jerde qutqarýshylar jumys istep jatyr.
Oqiǵa ornynda Órt sóndirý 11-bóliminiń (1,2) qyzmetkerleri, Respýblikalyq jedel-qutqarý otriadynan 9 adam, 1 tehnika, 1 kinologiialyq qyzmetker, sonymen qatar Almatynyń qutqarý qyzmetinen 5 adam men 1 tehnika jumys istep jatyr.
Sonymen qatar, oqiǵa ornynda Ushýdyń izdeý-apattyq qamtamasyz etý qyzmetiniń 4 tehnikasy men Almaty oblysy Órt sóndirý jáne qutqarý qyzmetiniń 2 tehnikasy bar. Ushaqta shyqqan órt aýyzdyqtaldy.
Sondai-aq ol jerde Almaty qalalyq qoǵamdyq densaýlyq saqtaý departamentiniń jedel-qutqarý jasaǵynyń 10 toby jumys istep jatyr.
