Abai atyndaǵy ulttyq memlekettik akademiialyq opera jáne balet teatrynyń úlken sahnasynda úsh túrli qoiylymnyń premerasy ótti, dep habarlaidy "Ult aqparat".
Reseilik rejisser Mihail Pandjavidze bastaǵan trýppanyń úzdik solisteri Fransýa Pýlenktiń «Adam daýysy», Dj. K. Menottidiń «Telefon» jáne Mikael Tariverdievtiń «Kútý» monooperasynyń premerasyn usyndy.
Reseilik rejisser Mihail Pandjavidze aitýynsha, monopera - bul úlken qoiylymdyq effektiler men dekoratsiialardyń artynda jasyrynýǵa bolmaityn kameralyq janr.
«Oiǵa alǵan jumysty iske asyrý ońai sharýa emes. Ol jaýapkershilikti talap etedi. Eskizderdiń ádemi bolǵanyn qalaimyn. Biz opera solisterimen de, sahna bezendirýshilermen de orasan zor jumys istedik. Teatr sahnasynda muqiiat zertteýdi jáne qajyrly eńbekti qajet etetin erekshe stsenografiialyq sheshim bolady. Spektaklderdegi jańa sheshimdermen kórermendi tańdandyryp, qýantamyz dep oilaimyn. Sonymen qatar, bul qoilymdar Ulttyq teatr repertýaryna laiyqty dep senemin», - dedi rejisser Mihail Pandjavidze.
Frensis Pýlenktiń «Adam daýysy» mono-operasy telefon áńgimesin baiandaidy. Qysqa ýaqyt ishinde keiipkerdiń ómiri túbegeili ózgeredi, munda adam seziminiń názik niýanstarynyń gammasy «sańyraý» telefon bailanysy arqyly beriledi.
Kostiýmder men dekoratsiia avtory — sýretshi Gari Hammel. Eskizder modern stilinde.
«Eskizder modern stilinde usynylǵan jáne keiipkerler obrazynda ózindik performans jasaidy, bul qoiylymnan alǵan áserińizdi arttyrady. Spektaklderde jasalǵan ekpin erekshe sintez qalyptastyrady. Kórermendi qoiylym men kórkemdik kórinisterdi usynýdaǵy zamanaýi sheshimder tań qaldyrady dep senemin», - deidi sýretshi.
Mikael Tariverdiev óziniń «Kútý» operasynda mahabbat, kóńilsizdik, senim men úmit baiandalady.
