Qalalyq politsiia departamenti men prokýratýra urlanǵan múlikti Qyrǵyzstanǵa aparyp satyp júrgen kanaldy áshkereledi, dep habarlaidy "Ult aqparat".
Arnaiy operatsiia «Qordai» keden beketiniń mańynda boldy. Qazaqstan Respýblikasynyń memlekettik shekarasynan shyǵyp bara jatqanda politsiia «Honda» markaly kóligin toqtatqan. Kólikti 23 jastaǵy Qyrǵyzstan azamaty tizgindegen. Avtokólikti tintý kezinde bagaj bóliminen arnaiy qujaty joq 45 uialy telefon tabyldy.
«Bul derek QR QK 196-baby boiynsha biryńǵai tergeý isi reestrine tirkeldi. Ustalǵan júrgizýshi jaz aiynan beri Almatyda ustalǵan telefondardy arzan baǵamen satyp alyp júrgenin moiyndaǵan. Ol bul telefondardy Almatydaǵy «Mega taý» saýda úiinde telefon satýmen ainalysatyn er adamnan alyp otyrǵan. Júrgizýshi otandasymen birge Almatyǵa kúnde kelip, ustalǵan telefondar men gadjetterdi alyp ketip Bishkekte satyp otyrǵan. Qazir «Mega taý» saýda úiiniń saýdageri de ustaldy. Ol urlanǵan telefondardy satýmen ainalysqanyn moiyndady. Onyń turatyn jerin teksergen kezde 64 urlanǵan telefon tabylǵan», - dedi PD kriminaldy politsiia basqarmasynyń basshysy Janbolat Ziadin.
Ustalǵandar qamaýǵa alyndy. Jaqyn arada Qyrǵyzstanǵa shekara asqan telefondar Almatyǵa qaitarylady.
Osydan birneshe jyl buryn politsiia Almatydan Qyrǵyzstanǵa zańsyz jiberilgen 100 uialy telefondy óz ielerine qaitarǵan bolatyn.
