Almaty politseileri urlanǵan kólikterdiń VIN kodtaryn aýystyrǵan oryndy tapty, - dep habarlaidy Tengrinews.kz agenttigi qalalyq Politsiia departamentiniń baspasóz qyzmetine silteme jasap.
"Kúdiktiler jumys istegen garajdan jiyntyq málimetterin joiý úshin daiyndalǵan túrli markaly 10 kólik tabyldy. Arnaiy operatsiiany Túrksib aýdanynyń DP men kriminaldyq politsiia qyzmetkerleri júrgizdi.
Kúdiktiler buryn sottalǵan. Olar osy garajdy jalǵa alǵandaryn, kólikterdiń jiyntyq derekterin ózgertýmen ainalysqanyn moiyndady", - delingen habarlamada.
Garajdy tekserý kezinde paidalanylǵan jáne paidalanylmaǵan metaldar, qaǵaz japsyrmalar, birneshe memlekettik nómirler, noýtbýkter, monitorlar men protsessorlar tabylǵan.
"Sonymen qatar, sot-meditsinalyq sarapshylar jiyntyq derekterdi ózgertý úshin qoldanylatyn eki lazerlik tańbalaý apparatyn, alfavittik jáne sandyq belgileýleri bar metall baspalardy, kólik quraldarynyń jiyntyq derekterinen uqsas qaripterdi tárkiledi.
Qazirgi ýaqytta sáikestendirý nómirleri ózgertilgen kólikterdi anyqtaý boiynsha jedel-izdestirý sharalary júrgizilip jatyr", - dep qosty politseiler.
Kúdiktiler qamaýǵa alyndy.
