Almatyda UBT tapsyrý barysynda epidemiologiialyq jaǵdai qatań saqtalady. Bul týraly onlain brifing barysnda qalalyq sanitariialyq-epidemiologiialyq baqylaý departamenti bilim jáne tárbie obektilerin baqylaý jáne qadaǵalaý bóliminiń basshysy Dina Sýhanberlieva aitty, dep habarlaidy "Ult aqparat".
Basty maqsat – epidemiologiialyq jaǵdai boiynsha Almatynyń «qyzyl» aimaqta bolýy aiasynda koronavirýstyq infektsiianyń taralýyna jol bermei, UBT ótkizý qaýipsizdigin qamtamasyz etý.
Dina Sýhanberlievanyń aitýynsha, sanitarlyq-epidemiologiialyq baqylaý departamenti test ótkiziletin ǵimarattarda zerthanalyq-aspaptyq zertteýdi aiaqtady.
«UBT ótkizý pýnktinde daiyndyq jumystary júrgizildi: irgeles aýmaqty, ǵimarattyń ishki jaǵyna tazalyq jumystary júrgizilip, jaryqtandyrý aspaptary, jeldetý júiesi tekserildi, meditsinalyq pýnkt daiyndaldy. Oqýshylar men qyzmetkerlerdiń jeke gigienasyn saqtaý úshin jaǵdailar jasalǵan. Aýyz sý rejimi uiymdastyrylǵan, oqýshylar kólemi 0,5 l bótelkedegi sýmen qamtamasyz etiledi, sonymen qatar qosymsha sý dispenserleri ornatylady»,-dedi ol.
Sonymen qatar, ol oqýshylarǵa alǵashqy meditsinalyq kómek kórsetý úshin qajetti jaraqtarmen jáne dári-dármektermen jabdyqtalǵan meditsinalyq pýnkt jumys isteitinin atap ótti. Sondai-aq jedel meditsinalyq kómek brigadasynyń kezekshisin, aimaqtyq emhanalardyń dárigerlerin tartý kózdelgen.
«Sanitaizer, teplovizor, dezinfektsiialyq eritindilermen jáne aiaq kiimge arnalǵan kilemsheler, bakteritsidti shamdar, aýa retsirkýliatorlary, paidalanylǵan maskalarǵa arnalǵan ýrnalar, áleýmettik qashyqtyqty saqtaý úshin kireberistiń aldynda jáne ǵimarat ishinde belgileý bári qamtylǵan. Aýditoriialarda konditsioner, qabyrǵa saǵattary, beinebaqylaý kameralary jáne beinetirkegishter qoiyldy», - deidi Dina Sýhanberlieva.
