Almatyda týristerdi jedel járdem jáne politsiia qyzmetine shuǵyl qosatyn 10 aqparattyq terminal ornatylady. Bul týraly Almaty Óńirlik kommýnikatsiialar qyzmeti alańynda ótken onlain-brifing barysynda qalalyq Týrizm basqarmasy basshysynyń orynbasary Marat Ainabekov aitty, dep habarlaidy QazAqparat.
«10 lokatsiiada aqparattyq terminaldar ornalastyrylady. Olar qala qonaqtaryna Almatynyń kórikti jerleri týraly aqparatty interaktivti túrde usynatyn bolady. Stendter arqyly týrister túrli qiyn jaǵdailarǵa tap bolǵan jaǵdaida politsiia qyzmetkerlerin, sondai-aq jedel járdem qyzmetkerlerin shaqyra alady», - dedi Marat Ainabekov.
Bul qurylǵylar «Týristik aqparat ortalyǵy» JShS kórsetken lokatsiiada:
1. Beiimbet Mailin kóshesindegi Almaty áýejaiynda;
2. Jibek Joly dańǵylyndaǵy kók bazarda;
3. Kóktóbede;
4. 28 panfilovshylar parkinde;
5. QR Tuńǵysh Prezidenti parkinde;
6. Abai-Baitursynov kósheleriniń qiylysynda;
7. «Medeý» kesheninde;
8. Panfilov-Gogol kósheleriniń qiylysynda;
9. Panfilov-Jibek joly kósheleriniń qiylysynda;
10. «Forum Almaty» saýda ortalyǵynda;
11. «Dostyk Plaza» saýda ortalyǵynda;
12. Almaty 2 temirjol vokzalynda;
13. «Essentai Mall» saýda ortalyǵynda;
14. «Shymbulaq» TShK;
15. Almaty ortalyq stadionynda;
16. Astana alańynda;
17. Abai atyndaǵy Ulttyq opera jáne balet teatrynda;
18. Memlekettik mýzeide;
19. «Mega Park», «Mega Alma-Ata» saýda, oiyn-saýyq ortalyǵynda;
20. «TsÝM» saýda ortalyǵynda ornalasady.
Bul terminaldar arqyly interaktivti kartamen túrli nysandardy izdep tabýǵa, týristik marshrýt syzýǵa, barlyq álem tilderinde aqparat alýǵa, qalada bolyp jatqan sharalar týraly bilýge bolady.
Sondai-aq, jedel núkteler boiynsha ájethana, meditsinalyq kómek núktelerin tabýǵa múmkindik bar.
«Sonymen qatar, taýǵa shyǵatyn týristerge apta saiyn týristik hab bazasynda (Balýan Sholaq atyndaǵy Sport saraiy aýmaǵynda) tegin bilim suhbattary ótkiziledi», - dep túsindirdi Marat Ainabekov.
