7-9 jeltoqsan aralyǵynda Almatydaǵy «Halyq Arena» sport kesheninde short-trekten álem kýbogynyń úshinshi kezeńi ótedi, dep habarlaidy "Ult aqparat".
QR Ulttyq olimpiadalyq komitetiniń baspasóz qyzmeti málim etkendei, Qazaqstannyń halyqaralyq jarystardy ótkizý tájiribesiniń joǵary ekenin eskergen Halyqaralyq konkishiler federatsiiasy (ISU) Almatyǵa álem kýbogy kezeńin alǵash ret senip tapsyryp otyr.
Álem kýbogy short-trekten ótetin eń iri halyqaralyq jarys sanalady. Almatyǵa alǵash ret short-trek juldyzdary qadam baspaq. Búginge deiin álemniń 18 memleketinen 151 sportshy ótinim berip úlgerdi.
Elimizge ISU-dyń úzdik uiymdastyrýshy mamandary da at basyn tireidi. Atap aitar bolsa, ISU-dyń tehnikalyq komitetin Kanadadan shyqqan Olimpiada chempiony Natali Lambert bastap kelmek. Ol 1992 jylǵy qysqy Olimpiada oiyndarynda bir altyn, eki kúmis jeńip alǵan. Sondai-aq, kópsaiys boiynsha álem chempionattarynda úsh ret top jarǵan.
Jarysty joǵary deńgeide uiymdastyrýǵa elimizdiń sport salasyndaǵy úzdik mamandar jumyldyrylyp otyr. Atap aitar bolsaq, 2011 jylǵy Aziia oiyndary men 2017 jylǵy Ýniversiadany uiymdastyrǵan kásibi mamandar jumysqa tartylýda.
Short-trekten Qazaqstan ulttyq quramasynyń bas bapkeri Mádiǵali Qarsybekov óz jerimizde ótetin dodada el namysyn kimder qorǵaitynyn málimdedi.
Almaty aidynynda tómendegi sportshylarymyz júldege talasady:
Áielder: Áliia Kim, Anastasiia Krestova, Olga Tihnonova, Ásel Taishymanova, Anita Nagai, Iana Han.
Erler: Abzal Ájiǵaliev, Nurbergen Jumaǵaziev, Denis Nikisha, Mersait Jaqsybaev, Erkebulan Shamuhanov jáne Ádil Ǵaliahmetov.
Short-trekten Qazaqstan quramasy Sochi Olimpiadasynan beri álemdik syndarda sátti óner kórsetip keledi. 2014 jylǵy Olimpiadada estafetadan bizdiń qurama besinshi oryn alǵan bolatyn.
2016-2017 jylǵy maýsymda Qazaqstan quramasy álem kýbogi kezeńderinen toǵyz medal jeńip aldy. Onyń úsheýi - altyn.
Óz jerimizde ótken Ýniversiada oiyndarynda short-trek sheberleri bes qola men bir kúmiske qol jetkizdi. Al Phenchhandaǵy qysqy Olimpiadaǵa Qazaqstan komandasy jeti joldama ielengen edi.
Biylǵy maýsym da sportshylarymyz úshin jaman bastalǵan joq. Kalgaride ótken álem kýboginiń alǵashqy kezeńinde Abzal Ájiǵaliev úsh birdei Olimpiada chempionymen jarysyp, kúmiske ielik etti.
AQSh-ta ótken ekinshi kezeńde Denis Nikisha úzdik tórttik qatarynan kórindi.
