Foto: Azamat Qusaiynov
Almatyda Ulttyq kitaphanada aqyn, aýdarmashy, Qazaqstannyń Halyq jazýshysy Tumanbai Moldaǵalievtiń 90 jyldyq mereitoiyna orai «Júregi jyrdan jaralǵan» atty ádebi-mýzykalyq kesh ótti, – dep habarlaidy Ult.kz.
Saltanatty sharaǵa kitaphana oqyrmany, BAQ ókilderi men ziialy qaýym, sondai-aq aqynnyń ómirlik jary Kúltai Qasymova men týystary qatysty.
Foto: Azamat Qusaiynov
«Búgin osy kitaphanada Tumanbai aǵalaryńa arnap 90 jyldyq toidyń basyn sizder bastap jatyrsyzdar. Kóp raqmet aitamyn! Men ne aitamyn, tek qana ol kisiniń ózi bolyp, aralaryńda jarqyrap otyrsa, tipti jaqsy bolar edi. Bir ókinishtisi sol ǵana. Ózi "sen artymda qal" dei berýshi edi. Bul otbasynyń oshaǵyn sóndirmei, bala-shaǵasyna ie bolsyn degeni eken ǵoi. Biz qol ustasyp, ómir boiy baratyn jerdiń bárine birge bardyq. Qazaqstannyń ishin de, sheteldi de birge araladyq. Sizderdei oqyrmany, halqy bar, bizdiń Tumekeń baqytty aqyn dep bilemin», – dedi Kúltai apai.
Kezinde bir top jas Tumanbai Moldaǵalievtyń shákirtimiz dep, úiine baryp, asyn iship, ádebietti birge jasaǵan kórinedi.
Foto: Azamat Qusaiynov
Sol azamattardyń biri – kompozitor Erjan Belǵoziev. Ol aqynnyń mereitoilyq sharasyna arnaiy qatysyp estelikterimen bólisti.
«Biz Tumaǵańnyń shákirtimiz, Tumaǵańnyń sheneýinen shyqtyq dep aitamyz. Bizdi tabystyrǵan óleń. Sonyń arqasynda biz de Tumaǵańnyń otbasynyń múshesindei bolyp kettik. Kez kelgen ýaqytta kelemiz, tún-kúnge qaramai Kúltai tátemiz as-shaiyn beretin. Tumaǵańmen aralasyp júrgende bizdi saiajaiyna alyp baratyn. Soǵan jas aqyndardyń basyn qosyp, áńgime aitamyz, ádebietti, poeziiany talqylaimyz. Sóitip júrgende neshe túrli ánder, ne túrli shyǵarmashylyq týyndylar týyp jatty. Sol arqyly qazaq ádebietiniń ózindik bir kezeńin, ózindik bir býynyn qalyptastyrdy aǵamyz», – deidi kompozitor Erjan Belǵoziev.
Osylaisha Qazaqstannyń Halyq jazýshysy Tumanbai Moldaǵalievtiń 90 jyldyq mereitoiy án-jyr keshimen jalǵasty.
Qazaqtyń birtýar aqyny Tumanbai Moldaǵaliev 1935 jyly 20 naýryzda Almaty oblysy, Eńbekshiqazaq aýdany, "Jarsý" keńsharynda dúniege kelip, 2011 jyly 10 qazanda Almatyda qaitys boldy.
Onyń tuńǵysh óleńi "Ýkraina qyzyna" 1954 jyly jariialanyp, alǵashqy óleńder jinaǵy "Stýdent dápteri" 1957 jyly jaryq kórdi.
Tumanbai Moldaǵaliev názik syrly, oily da otty jyrlarmen tanyldy. Sondai-aq Tumanbai Moldaǵaliev kóptegen án mátinderiniń avtory. Ol "Qustar qaityp barady", "Qustar áni", "Kýá bol", "Baqyt qushaǵynda" syndy tanymal ánderge sóz jazǵan.
«Júrektegi jazýlar» óleńder jinaǵy úshin Qazaqstan Respýblikasynyń Abai atyndaǵy Memlekttik syilyǵyn, Halyqaralyq Fizýli syilyǵynyń laýreaty atanǵan.
