Almatyda 239 bala koronavirýstan aiyqqan. Bul týraly búgin onlain brifingte Almaty qalalyq balalar klinikalyq juqpaly aýrýlar aýrýhanasynyń bas dárigeri Erjan Seralin aitty, dep habarlaidy QazAqparat.
«Covid-19 infektsiiasymen kúres bastalǵaly beri Almatyda 239 bala koronavirýstan emdelip shyqty. Balalar arasynda ókpe qabynýy boldy. Degenmen kóbi jeńil nemese ortasha aýyr túrimen aýyrdy. Balalardyń barlyǵy din aman. Qazir 9 bala em qabyldap jatyr. Qal-jaǵdaiy birqalypty», - deidi Erjan Seralin.
Onyń aitýynsha, keshe aýrýhanadan týǵanyna 10 kún bolǵan náreste shyǵaryldy.
«Keshe 10 kúndik balany shyǵardyq. Birneshe kúnge sozylǵan em-domnan keiin anasy ekeýiniń PTR-testileýi taza bolǵandyqtan aýrýhanadan shyǵardyq», - dedi ol.
Aita ketý kerek, Qazaqstan boiynsha koronavirýs juqtyrǵandardyń sany 73 468 adamǵa jetti. Almatyda 9 394 adam indetke shaldyqqan. Onyń ishinde qalada 73 adam qaitys boldy.
