Almatynyń Sain kóshesinde tórt avtokóliktiń qatysýymen iri jol apaty boldy, dep habarlaidy "Ult aqparat".
Qalalyq politsiia departamentiniń málimetinshe, oqiǵa 16 qazan, túngi saǵat 22:00-de bolǵan.
«Toyota Camry avtokóliginiń júrgizýshisi Sain kóshesimen soltústik baǵytta kele jatty. Jubanov kóshesiniń tómengi jaǵynda oryn aýystyrý kezinde Mitsubishi Delica kóligimen soqtyǵysýǵa jol berdi. Soqqynyń inertsiiasymen Toyota Camry FAW Jiefang-ke baryp soǵyldy. Al ol inertsiia boiynsha ilespe baǵytta kele jatqan basqa Toyota Camry-di soqty», - dedi Almaty qalalyq politsiia departamenti anyqtaý basqarmasynyń bastyǵy, podpolkovnik Oljas Sháripov.
Jol apaty saldarynan FAW Jiefang júrgizýshisi men jolaýshysy qalalyq aýrýhanaǵa jetkizildi.
Oqiǵanyń mán-jaiyn Áýezov aýdanynyń politsiia qyzmetkerleri tekserip jatyr.
