Meditsinalyq-sanitarlyq kómekti damytýǵa úles qosqan sheteldik dárigerler, sondai-aq COVID-19 diagnostikasy men emdeý hattamasyn ázirleýshi otandyq infektsionister Tóregeldi Sharmanovtyń halyqaralyq syilyǵyna ie boldy, dep habarlaidy QazAqparat.
2021 jylǵy 16 aqpanda Qazaqstanda Tóregeldi Sharmanovtyń halyqaralyq qory quryldy, onyń qyzmeti densaýlyqqa qatysty jalpyǵa birdei quqyq ideiasyn damytýǵa baǵyttalǵan.
Qor qyzmeti aiasynda Sharmanovtyń halyqaralyq syilyǵynyń laýreattaryna marapattar saltanatty túrde tabys etildi.
Alqaly marapatqa alǵashqy meditsinalyq-sanitarlyq kómekti damytýǵa qosqan úlesi úshin Djons Hopkins ýniversitetiniń sheteldik ǵalymdary Devid Bishai men Maik Shlaif, sondai-aq qazaqstandyq dárigerler, COVID-19 diagnostikasy men emdeý hattamasyn ázirleýshi infektsionister – Baqyt Kósherova men Amangúl Dúisenova ie boldy.
Shara barysynda Almaty ákimi Baqytjan Saǵyntaev professor Tóregeldi Sharmanovty týǵan kúnimen quttyqtap, onyń otandyq densaýlyq saqtaý júiesiniń qalyptasýy men damýyna qosqan zor úlesin atap ótti.
Tóregeldi Sharmanovtyń halyqaralyq qorynyń missiiasy – densaýlyq saqtaý jáne durys tamaqtaný salasyndaǵy jas jáne bolashaǵy zor ǵalymdardyń jobalaryn qoldaý.
Budan basqa, qor dietologiiamen ainalysatyn álemdik akademiialyq ortalyqtarda mamandardyń taǵylymdamasyna granttar berý josparda bar.
Tóregeldi Sharmanov – elimizdegi meditsinanyń iri uiymdastyrýshylarynyń biri, Qazaqstan men Ortalyq Aziia respýblikalaryndaǵy nýtritsiologtar mektebiniń negizin qalaýshy.
Ol 1978 jyly Almatyda Dúniejúzilik densaýlyq saqtaý uiymy men IýNISEF qamqorlyǵymen alǵashqy meditsinalyq-sanitarlyq kómek jónindegi halyqaralyq konferentsiiany ótkizýdiń bastamashysy retinde álemdik jáne qazaqstandyq densaýlyq saqtaýǵa zor úles qosty.
Konferentsiia qorytyndysy boiynsha álemdik densaýlyq saqtaýdaǵy negizgi qujattardyń biri – Almaty deklaratsiiasy qabyldandy, onda alǵashqy meditsinalyq-sanitarlyq kómektiń ulttyq júiesin uiymdastyrý tujyrymdamasy alǵash ret baiandaldy.
