Almatyda tis dárigerine barǵannan keiin 55 jastaǵy er adam qaitys boldy, - dep habarlaidy Tengrinews.kz tilshisi.
Qaiǵyly oqiǵa 9 aqpanda bolǵan. Onyń egjei-tegjeii Instagram jelisindegi zhaloby.almaty-paraqshasynda jariialandy. Jazba avtorynyń aitýynsha, er adamnyń eki tisin julyp, implant ornatý kerek bolǵan. Alaida marqumnyń týystarynyń aitýynsha, otadan keiin er adamda anafilaktikalyq shok bolǵan.
"Emhana dárigerleri oǵan alǵashqy kómek kórsetpei jatyp shai ishýdi usynǵan. Adamdy aman alyp qalýǵa bolatyn qundy ýaqytty jiberip aldy. Ol aýyryp qalǵanda emhana qyzmetkerleri tipti týystaryna telefon soqpaǵan. Aýrýhanaǵa jetkizý kezinde jedel járdemde eshkim erip júrmegen, tamyr soǵysy toqtap, tynys almai qalǵan. Ol 55 jasta, deni saý, kóńildi adam edi.
Hirýrgpen, bas dárigermen jáne emhananyń negizin qalaýshymen sóilesken kezde olar hattamalardy oryndamaityny belgili boldy: olar ota jasaýǵa kelisim alyp, naýqastarǵa taldaý jasamaidy, operatsiia aldynda kardiogramma jasap, anestetikterge test almaidy. Barlyq kelisim tek sóz júzinde. Emhana qyzmetkerleri qabiletsiz, olardyń salǵyrttyǵynan ákem qaitys boldy. Qoldaý suraimyn, mundai aq halatty abzal jandar jazasyz qalmaýy kerek. Ákemniń ornynda kez kelgen adam bolýy múmkin edi", - delingen jazba mátininde.
