Ulttyq qaýipsizdik qyzmeti terrorizm aktisin daiyndaý jolyn kesti, dep habarlaidy "Ult aqparat" UQK baspasóz qyzmetine silteme jasap.
«Almaty qalasynyń Almaly aýdandyq qylmystyq sotynyń A.J. Bitimbaevty terrorizm aktisine daiyndalý, terrorizmdi nasihattaý, dini alaýyzdyqty qozdyrý jáne atys qarýyn zańsyz saqtaý faktileri boiynsha 10 jylǵa sottaý týraly úkimi zańdy kúshine endi. Ol UQK nazaryna destrýktivti dini ideologiiany ustanýshy jáne Qazaqstan Respýblikasynda tyiym salynǵan «DAISh» halyqaralyq terroristik uiymynyń jaqtasy retinde ilikti», - delingen habarlamada.
Tekserý barysynda onyń Internette «DAISh» úgit-nasihatynyń yqpalymen halyq kóp shoǵyrlanǵan oryndarda jarylǵyshty paidalanýmen teraktiler daiyndaýy týraly aqparat alyndy.
Qarýly shabýyl jasaǵannan keiin ol shetel sodyrlarynyń qataryna ótý jáne terroristik áreketin jalǵastyrý úshin Siriiaǵa jetýdi josparlaǵan.
Bitimbaevtyń kórsetilgen oilaryn boldyrmaý úshin ony aǵymdaǵy jyldyń sáýirinde Almatyda ishki ister organdaryn tarta otyryp, UQK kúshimen ustaý júrgizildi.
Tintý kezinde odan atys qarýy men travmatikalyq qarý, jarylǵysh quraldar jasaýǵa arnalǵan quramdas bólshekter, úsh saýda-oiyn-saýyq ortalyǵynyń syzbalary, betperde men qolǵap alyndy.
Bitimbaevtyń kinási kýágerlik túsiniktermen, zattai jáne ózge de dáleldermen tolyqtai dáleldendi.
