Almatyda kolledjderge tehnikalyq jáne kásiptik bilim berý baǵdarlamalary boiynsha mamandardy daiarlaýǵa qoiylatyn talaptar kúsheitildi, dep habarlaidy "Ult aqparat".
Qazaqstan Prezidenti Qasym-Jomart Toqaev óziniń 2020 jylǵy 1 qyrkúiektegi Joldaýynda qoljetimdi jáne sapaly bilim berýdiń mańyzdylyǵyn erekshe atap ótti. Eńbek naryǵynda talap etiletin quzyretterdi qalyptastyrýǵa kásiptik bilim berýdiń barlyq júiesin qaita baǵdarlaý máselesine erekshe nazar aýdaryldy.
Óńirlik kommýnikatsiialar qyzmeti alańynda ótken onlain brifing barysynda Almaty qalasy bilim berý sapasyn qamtamasyz etý departamentiniń basshysy Gúlnar Ermekbaeva 2020 jyldyń 1 qazanyndaǵy jaǵdai boiynsha Almaty qalasynyń aýmaǵynda tehnikalyq jáne kásiptik bilim berý baǵdarlamalary boiynsha bilim berý qyzmetine litsenziiasy bar 104 bilim berý uiymy tirkelgenin aitty. Onyń ishinde 35-i memlekettik kolledj, 61-i jekemenshik kolledj.
Almaty qalasynyń tehnikalyq jáne kásiptik bilim berý uiymdaryndaǵy bar mamandyqtar men biliktilikter boiynsha QR Bilim jáne ǵylym ministriniń 2018 jylǵy 27 qyrkúiektegi buiryǵymen bekitilgen 104 kolledjde tehnikalyq jáne kásiptik, orta bilimnen keiingi bilimniń mamandyqtary men biliktilikteriniń 15 baǵyty boiynsha ruqsattary bar.
Spiker kolledjderdi beiindeýdiń mańyzdylyǵyna jeke toqtaldy.
«Tehnikalyq jáne kásiptik bilim berýdiń mamandanýy salalyq baǵyttar: tehnikalyq, tehnologiialyq, aýyl sharýashylyǵy, qurylys jáne kommýnaldyq sharýashylyq jáne taǵy basqa boiynsha naqtylanatyn bolsa, óńirdiń oqý oryndarynda mamandyqtardyń qaitalanýyn boldyrmaidy. Tehnikalyq jáne kásiptik bilimi bar mamandardy daiarlaýǵa memlekettik tapsyrysty bólý kezinde memlekettik tapsyrysty ornalastyrý jónindegi komissiia músheleri birinshi kezekte kolledjderdi beiindeýge basa nazar aýdarýy tiis», - dedi spiker.
Tehnikalyq jáne kásiptik bilim berý uiymdarynyń bilim berý qyzmetine qoiylatyn talaptardy arttyrý maqsatynda QR Bilim jáne ǵylym ministrligi biyl shilde aiynda «Bilim berý qyzmetine qoiylatyn biliktilik talaptaryn jáne olarǵa sáikestikti rastaityn qujattardyń tizbesin bekitý týraly» QR Bilim jáne ǵylym ministriniń 2015 jylǵy 17 maýsymdaǵy №391 buiryǵyna ózgerister engizdi.
Atap aitqanda, tehnikalyq jáne kásiptik bilim berý uiymdarynyń bilim berý qyzmetine qoiylatyn talaptarǵa, mindetti sharttaryna tómendegi tarmaqtar qosyldy:
- qolledjder sońǵy 2 jylda mamandyǵy boiynsha bilim alýshylardy úzdiksiz qabyldaýdy júzege asyrýy qajet;
- mamandyq boiynsha bitirýshilerdiń jalpy sanymen salystyrǵanda jumysqa ornalasqandardyń jáne jumyspen qamtylǵandardyń úlesi 75% - dan kem bolmaýy tiis.
«Atalǵan talaptar kolledjder úshin mamandardy beiindeý jáne daiarlaý turǵysynan sheshim qabyldaýǵa jaqsy yntalandyrý bolady dep úmittenemiz. Búgingi tańda qalanyń 5 kolledji 20 biliktilik boiynsha litsenziiaǵa qosymshany qaitaryp berdi jáne osy másele boiynsha jumysty bizdiń Departament udaiy júrgizetin bolady», - dep qorytyndylady G.Ermekbaeva.
