Almaty órt sóndirýshileri Qimasar shatqaly baýraiynda órtengen qurǵaq shópti tikushaqtyń kómegimen sóndirdi, dep habarlaidy "Ult aqparat".
Almaty TJD baspasóz qyzmetiniń málimetinshe, 9 tamyzda tańǵy saǵat 5:49-da Medeý aýdanyndaǵy Qimasar shatqaly baýraiynda qurǵaq shóp janǵany týraly habarlama kelip túsken.
«Oqiǵa bolǵan jerge TJD tabiǵi órtti sóndirý boiynsha birlesken arnaiy quramy - 36 adam, 9 tehnika, sondai-aq Ile Alataýy MUTP qyzmetkerleri dereý jiberildi. 500 sharshy metrlik alańda qurǵaq shóp pen daýyl qulatqan aǵashtar órtke oranyp jatqan. Betkeidiń tik bolýy órt sóndirý tehnikasyn alyp ótýge kedergi keltirgen. Órt sóndirýshiler jaiaý kóterilgen.
Órtti sóndirý úshin Ermak aspaly órt sóndirgishi, shantsty quraldar (shartyldaqtar, kúrekter) qoldanyldy. Órt tutanǵan aimaqtaǵy jer jyrtylyp, nátijesinde órt 07:39-da aýyzdyqtaldy. Qurǵaq shópti sóndirýge QR TJM Mi-171 tikushaǵy jumyldyrylyp, 13:41-de tolyqtai sóndirildi», - dep habarlady TJD-dan.
Órt sóndirýshiler túske deiin Medeý aýdanyndaǵy Aqmeshit kóshesiniń boiyndaǵy 7 myń sharshy metr, Alataý aýdany Indýstriialy aimaǵyndaǵy 1,5 gektar, Naýryzbai aýdany Kókterek kóshesiniń boiyndaǵy 1000 sharshy metr aýmaqty qamtityn qurǵaq shópti de qatar sóndirgen.
Almaty qalalyq TJD taýly-ormandy jerlerde órt qaýpiniń joǵary bolýyna bailanysty qala turǵyndary men qonaqtarynan ashyq otty paidalanýdan, ot jaǵýdan, temeki shegýden jáne qurǵaq shóp pen orylǵan shópti jaǵýdan bas tartýdy suraidy.
Eske salaiyq, QR Ákimshilik kodeksi 367-babynyń 3-bóligine sáikes, erekshe qorǵalatyn tabiǵi aýmaqtarda órt qaýipsizdigi talaptaryn buzǵan jeke tulǵalarǵa 100 AEK - 291 myń 700 teńge mólsherinde aiyppul salynady. Kináli tulǵalar qylmystyq jaýapkershilikke tartylady.
