Áleýmettik jelide tamaq jetkizýshi jigit pen úi iesiniń arasyndaǵy janjaldyń videosy tarady. Almaty qalasynyń politsiiasy oqiǵa qatysty qylmystyq is qozǵady.
Videoda moped kaskasyn kigen jigit pyshaq ustap, kiltti qaitarýdy talap etip jatyr. Úidiń iesi odan ketpenmen qorǵanyp júrgenin baiqaýǵa bolady. Aýlaǵa kiremin degende ony ary qarai iterip jiberedi. Biraq tamaq jetkizýshi jigit ketpendi ustap alady. Pyshaǵyn da sermep úlgeredi. Artynan aýlaǵa kirip, kiltin alyp ketken.
Almaty qalalyq politsiia departamenti bul oqiǵanyń Bostandyq aýdanynda bolǵanyn habarlady.
Qazirgi kezde Qylmystyq kodekstiń 293-baby 3-tarmaǵy (Buzaqylyq, sýyq qarýdy qoldanýǵa tyrysyp jasalǵan áreket) boiynsha sotqa deiingi tergeý sharalary bastalǵan.
"Osy qylmysty jasady degen kúdikpen 1992 jyly týǵan er adam ustaldy. Pyshaq tárkilenip, qylmystyq is materialdaryna tirkeldi. Oqiǵanyń mán-jaiy anyqtalyp jatyr", - deidi politseiler.
Aita keteri, bul qylmys úshin úsh jyldan jeti jylǵa deiingi merzimge bas bostandyǵyn shekteý ne sol merzimge bas bostandyǵynan aiyrý jazasy qarastyrylǵan.
