Almatydaǵy «Kóktem-2» shaǵynaýdanynda birneshe aǵash zańsyz kesildi. Bul týraly Jasyl ekonomika basqarmasynan málim etti, dep habarlaidy "Ult aqparat".
Bul joly Timiriazev kóshesiniń boiynda ornalasqan «KFC» jyldam tamaqtaný jelisi mańynda tórt qaraǵashty zańsyz kesip tastaý faktisi anyqtaldy.
Almaty qalalyq Jasyl ekonomika basqarmasynan atap ótkendei, atalǵan mekenjai boiynsha aǵash kesýge ótinish túsken joq jáne eshqandai ruqsat berilmegen.
«Dúisenbi kúni Almaty Politsiia departamentimen birge jer ýchaskesiniń iesi R.Esenǵalievke qatysty QR Ákimshilik kodeksiniń 386-baby (Jasyl aimaqtardy kútip ustaý jáne qorǵaý erejelerin buzý) boiynsha ákimshilik hattama jasaldy jáne zańǵa sáikes 15 AEK aiyppul salyndy», - dep habarlady basqarmadan.
Ótemaqy retinde jalpy paidalaný oryndarynda 40 japyraqty kóshet otyrǵyzylatyn bolady.
Eske sala ketsek, 23 qarashaǵa qaraǵan túni Almatyda saýda úiiniń janynda (Áýezov-Tóle bi kósheleriniń qiylysy) jaiqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.
«Qazir aýdan ákimdigi men Politsiia departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etken bolatyn qala ákimdiginen.
Bul jaǵdaiǵa Prezident Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.
24 qarasha kúni B.Saǵyntaev máseleni óz baqylaýyna alǵanyn málim etti.
Almaty prokýratýrasy zańsyz aǵash kesý faktisi boiynsha tergeý júrgizýde.
