Almatyda sońǵy segiz kúnde meningokokk infektsiiasy tirkelmedi. Bul týraly Almaty qalalyq Densaýlyq saqtaý basqarmasynyń ókilderi aitty, - dep habarlaidy Tengrinews.kz tilshisi.
"Balalar jáne eresekterdiń juqpaly aýrýlar aýrýhanasynyń jansaqtaý bólimderinde naýqastar joq. Búginde segiz naýqas meningokokk infektsiiasymen statsionarlarda jatyr. Saýyǵyp jatyr", - delingen habarlamada.
"3 148 adam tekserildi, olarǵa qatysty aldyn ala sharalar júrgizildi. Osyǵan deiingi kúnderge qaraǵanda meditsinalyq kómekke júginip jatqan halyqtyń sany azaiǵanyn baiqadyq", - dep habarlady vedomstvo ókilderi.
Densaýlyq saqtaý ministrliginiń málimetinshe, biyl jyl basynan beri meningokokk infektsiiasy boiynsha 60 jaǵdai tirkelgen. Olardyń 13-i ólimmen aiaqtaldy. Almaty men Almaty oblysynda 10 adam, Ońtústik Qazaqstan oblysynda 2 adam, al Qyzylordada bir adam kóz jumdy.
Eske sala keteiik, osyǵan deiin ministrlik ókilderi jaǵdaidyń baqylaýynda turǵanyn aitqan edi.
Meningokokk infektsiiasy - bakteriialar týdyratyn, simptomsyz tasymaldaýshylyq, nazofaringittan (muryn jáne jutqynshaqtyń silemeili qabyǵynyń qabynýy) bastap meningit (mi qabyǵynyń qabynýy), meningokokk sepsisine (qannyń zaqymdanýy) deiin ártúrli klinikalyq belgilermen ótetin - jiti infektsiialyq aýrý ekendigin este saqtaý qajet. Infektsiia kózi aýrý adamdar jáne "deni saý tasymaldaýshylar" bolyp tabylady, iaǵni qandai da bir klinikalyq belileri joq, biraq olar meningokokk kózi bolyp tabylatyn adamdar. Meningokokk infektsiiasymen syrqattanýshylyq kezeńdiligimen sipattalady - qysta jáne erte kóktemde syrqattanýshylyq óte joǵary.
Infektsiianyń berilý joly - aýa-tamshy arqyly (jótelgen, túshkirgen, sóilesken kezde). Infektsiia qozdyrǵyshy syrtqy ortada óte turaqsyz. Mikrob deni saý adamnyń organizmine naýqas nemese tasmaldaýshy adammen uzaq jáne tyǵyz qarym-qatynasta bolǵanda joǵarǵy tynys alý joldarynyń silemeili qabyǵy arqyly enedi. Juqtyrǵan kezden bastap aýrýdyń bastalýyna deiin bir kúnnen on kúnge deiin ótedi. Naýqas aýrýdyń alǵashqy kúninen bastap ainaladaǵy adamdar úshin juqtyratyn adam bolyp sanalady.
