Almatyda sheteldik azamattarǵa JSN berý úshin ashylǵan arnaiy HQKO-da uzyn-sonar kezek paida boldy, - dep habarlaidy Massaget.kz portaly.
Áleýmettik jelide HQKO-lardyń birine JSN alýǵa kelgen Resei azamattary jinalǵan uzyn-sonar kezektiń videosy paida boldy.
"Azamattarǵa arnalǵan úkimet" KEAQ Almaty boiynsha filialynyń baspasóz qyzmeti málimetinshe, kezek shynymen bar, biraq bul másele sheshilip jatyr jáne Resei Federatsiiasy azamattary 2-3 minýt ishinde qyzmet alyp jatyr. Bul rette reseilikter kezegi Jetisý aýdany, Qulager shaǵynaýdany, Qazybaev kóshesi, 286v mekenjaiy boiynsha Qulager shaǵynaýdanyndaǵy FOK (sporttyq-saýyqtyrý kesheni) ǵimaratynda arnaiy uiymdastyrylǵan bir ǵana HQKO-da baiqalady.
Sýret: Almaty qalasy "Azamattarǵa arnalǵan úkimet" baspasóz qyzmeti
"Olar eshkimge kedergi jasamaidy. Bul - jumysy kúsheitilgen halyqqa qyzmet kórsetý ortalyǵy. Onda aldymen 20 jumys orny bólingen, qazir 40 qyzmetker qyzmet kórsetip jatyr. Reseilikterge kóshi-qon qyzmetiniń qyzmetkerleri de keńes berip jatyr", - dedi baspasóz qyzmeti ókilderi.
HQKO-da bir kúnde sheteldikterdiń 3-3,5 myń ótinimi qaralady. Bul ádettegi júktemeden 50 paiyzǵa artyq. Qyzmetkerler 09:00-den 20:00-ge deiin, talon alǵan sońǵy klientke deiin jumys isteidi. Klientterge yńǵaily bolý úshin HQKO-ǵa aýyz sý ákelinedi jáne sheteldik azamattardyń túnde qalatyn jeri bolmaǵan jaǵdaida oryndar beriledi.
Sondai-aq, JSN alý úshin shetel azamattary "Bank TsentrKredit" filialdaryna kelesi mekenjailar boiynsha júgine alady:
- Almaly aýdany, Shevchenko kóshesi, 140;
- Áýezov aýdany, Aqsai-2 shaǵynaýdany, 9a úi;
- Almaly aýdany, Nazarbaev dańǵyly, 65;
- Medeý aýdany, Qonaev kóshesi, 1;
- Almaly aýdany, Tóle bi kóshesi, 143a;
- Almaly aýdany, Bógenbai batyr kóshesi, 156;
- Bostandyq aýdany, Jandosov kóshesi, 1.
Odan bólek, Resei azamattarynyń JSN-di onlain rejiminde arnaiy bot, banktik qosymsha nemese SMS habarlama arqyly alý múmkindigi bar.
