Almaty qalasynda salmaǵy 6,2 keli, boiy 66 santimetr náreste dúniege keldi, dep habarlaidy QazAqparat.
Kishkentai alyp Almaty Perinatologiia jáne balalar kardiohirýrgiiasy ortalyǵyna kesar tiligimen dúniege keldi. Onyń salmaǵy 6 keli 280 gramm, boiy 66 sm.
«Tuńǵysh balasyn ómirge ákelgen 20 jastaǵy ananyń jaǵdaiy qazir qanaǵattanarlyq. Sábi anasynyń qasynda. Jańa týǵan náresteniń densaýlyǵy óte jaqsy, ol dárigerlerdiń baqylaýynda», - dedi ortalyq direktory Gúlnar Nurlanova.
Direktordyń aitýynsha, bul Perinatologiia jáne balalar kardiohirýrgiiasy ortalyǵynda mundai salmaqpen týǵan alǵashqy oqiǵa.
«Bizde analar úlken salmaqpen sábilerdi dúniege ákep jatady. Sońǵy ret salmaǵy 5, 8 keli náreste dúniege kelgen bolatyn. Biraq bizdiń Ortalyqta 6 keli 280 gramm birinshi ret bolyp otyr», - deidi Gúlnar Nurlanova.
