Almaty ákimshilik quqyq buzýshylyqtar boiynsha mamandandyrylǵan aýdanaralyq soty belsendi Saltanat Táshimovany ruqsat etilmegen mitingke qatysqany úshin 15 táýlikke qamaý týraly sheshim shyǵardy, dep habarlaidy QazAqparat.
6 maýsym kúni Almaty qalasynyń ákimshilik sotyna mitingke zańsyz qatysý faktisi boiynsha Saltanat Táshimovaǵa qatysty material tústi (ÁQBtK-niń 488-babynyń 6-bóligi).
Saltanat Táshimovaǵa Bostandyq aýdanyndaǵy «Minina» skverinde birqatar turǵyn úi kesheniniń turǵyndarymen birge 9 sáýirde bilikpen kelisilmegen mitingige qatysty degen aiyp taǵyldy.
Miting kezinde turǵyndar saiabaq mańynda 12 qabatty turǵyn úidiń salynbaýyn talap etken.
Prokýror sottan Saltanat Táshimovany ÁQBtK-niń 488-babynyń 6-bóliginde kózdelgen ákimshilik quqyq buzýshylyqty jasaǵany úshin kináli dep tanyp, 15 táýlikke ákimshilik qamaqqa alý túrindegi ákimshilik jaza qoldanýdy surady.
«15 táýlikke ákimshilik qamaqqa alýdy taǵaiyndaý bóliginde, ákimshilik jazanyń túri men mólsherin anyqtaý kezinde sot quqyq buzýshylyqtyń sipatyn, quqyq buzýshylyqty qasaqana jasaý faktisin eskergenin atap ótken jón. Quqyq qorǵaý organdary, jergilikti atqarýshy organ ókilderiniń quqyq buzýshylyqty toqtatý týraly talappen zańdy túsindirýlerine qaramastan, quqyqqa qaishy minez-qulyqtyń jalǵasýy anyqtaldy», - dep habarlady Almaty qalasynyń ákimshilik quqyq buzýshylyq isteri jónindegi mamandandyrylǵan aýdanaralyq sotynan.
Aita keteiik, sot otyrysynda ekobelsendi Saltanat Táshimova óz kinásin moiyndaǵan joq.
«Qazirgi ýaqytta sot aktisi zańdy kúshine engen joq. Sot sheshimine qatysty apelliatsiialyq sotqa shaǵym túsirýge quqyly», - dep atap ótti vedomstvadan.
