Almatyda saiasi reformalardyń úsh prezidenttik paketin júzege asyrý boiynsha saraptamalyq talqylaý ótti, dep habarlaidy QazAqparat.
Is-sharaǵa belgili qazaqstandyq sarapshylar, saiasattanýshylar, QR Parlamenti Májilisiniń depýtattary jáne ulttyq qoǵamdyq senim keńesiniń músheleri qatysty.
Jiyndy QR Prezidentiniń kómekshisi, Ulttyq keńestiń hatshysy Erlan Qarin ashty.
Saraptamalyq shara aiasynda saiasattanýshy Andrei Chebotarevtiń «Qazaqstan Prezidenti Qasym-Jomart Toqaevtyń saiasi bastamalary: 3 pakettiń erekshelikteri» atty taldamalyq baiandamasy tanystyryldy.
Baiandamada Memleket basshysynyń saiasi bastamalaryna sholý jasalyp, olardyń iske asyrylýyna taldaý jasaldy.
Atap aitqanda, baiandamada Qazaqstandaǵy saiasi reformalar rettilikpen jáne kezeńdilikpen sipattalatyny atap ótilgen.
Avtor bul reformalar koronavirýs pandemiiasynan týyndaǵan mańyzdy protsesterge qaramastan tiimdi júzege asyrylyp jatqanyn atap ótti.
«12 maýsymda Qasym-Jomart Toqaevtyń QR Prezidenti qyzmetine resmi kiriskenine eki jyl tolady. Bul rette sol kúni ol qabyldaǵan alǵashqy sheshimderdiń biri «QR Prezidenti janyndaǵy ulttyq qoǵamdyq senim keńesin qurý týraly« jarlyq boldy. Osylaisha, Memleket basshysy ótken prezidenttik sailaý kezinde memleket pen qoǵamnyń dialogyn ótkizýge qatysty aitqan nietin oryndaýǵa kirise otyryp, óziniń birbetkeiligi men dáiektiligin kórsetti. Osyǵan qosa, Prezident óz Jarlyǵymen QR Prezidentiniń sailaýaldy «Igilik barshaǵa! Sabaqtastyq. Ádildik. Órleý» baǵdarlamasyn iske asyrý jónindegi is-sharalar josparyn bekitti.
Keibir tiisti sharalar, sondai-aq keiinirek belgilengen jańa sharalar QR Prezidentiniń reformalardyń úsh paketin jasaǵan 23 bastapqy saiasi bastamalarynyń negizine alyndy. Bul rette 2020 jyly osy paketterdiń alǵashqysy tolyǵymen iske asyryldy. Qalǵan eki paket boiynsha tiisti tujyrymdamalardy, zańdar men zańǵa táýeldi aktilerdi ázirleý, talqylaý jáne qabyldaý boiynsha jumys jalǵasýda», - dedi «Alternativa» ózekti zertteýler ortalyǵynyń direktory Andrei Chebotarev.
Usynylǵan analitikalyq qujattyń bir ereksheligi - baiandamanyń jeke bir bólimi Memleket basshysynyń quqyq qorǵaý salasyndaǵy bastamalaryna arnalǵan.
Atap aitqanda, avtor jaqynda Memleket basshysy qol qoiǵan «Qazaqstan Respýblikasynyń Adam quqyqtary salasyndaǵy keiingi sharalary týraly» jarlyq sheńberindegi quqyq qorǵaý bastamalaryna sholý jasady.
Sonymen qatar, talqylaý barysynda aldaǵy tikelei aýyl ákimderin sailaýǵa erekshe kóńil bólindi.
Sarapshylar aýyl ákimderin tikelei sailaýǵa kóshý saiasi jańǵyrýdyń jańa kezeńin bildiretin jáne azamattardy qoǵamdyq protsesterge tartýǵa yqpal etetin mańyzdy oqiǵa bolyp tabylatynyn atap ótti.
Májilis depýtaty, belgili saiasattanýshy Aidos Sarymnyń pikirinshe, sailaýdan keiin jańa taldaý júrgiziledi.
«Bizdiń sarapshy Andrei Chebotarev óziniń taldaý ortalyǵymen aýyl jáne aýdan ákimderin tikelei sailaý boiynsha arnaiy baiandama daiyndady. Qazaqstan Ortalyq Aziiada alǵash ret osyndai sailaýǵa kirisýdi josparlap otyr. Bul - qoǵamǵa áser etetin mańyzdy sheshim. Endi osy sailaýdy ótkizgennen keiin biz sabaq alamyz, nátije shyǵaramyz jáne qyrkúiek aiynda úlken zertteýler men taldaýlar bolady. Bul - olardyń alǵashqysy», - dedi spiker.
Sondai-aq, Aidos Sarymnyń aitýynsha, qazir aýyldarda salyqtyń tórt túri qosymsha qarastyrylyp otyr.
«Jerge keletin bolsaq, munda jerdi jalǵa berý, jer telimin satý jáne basqalar bar. Budan ári jer ýchaskesiniń baǵasyn aýyl turǵyndary anyqtaidy. Sol siiaqty kóptegen ózgerister bolady. Bul ne úshin qajet? Sebebi, aýyl turǵyndary óz ishinde birtutas bolýy kerek. Qoldanystaǵy zańda qala nemese aýyl mártebesin ózgertý úshin bes jyl beriledi. Iaǵni, Úkimet eldi mekendi nemese qalany qaita qurmaidy nemese salmaidy. Demek, árbir aýyl óz taǵdyryn ózi sheshe alady», - dep atap ótti Májilis depýtaty.
Jalpy, talqylaý barysynda usynylǵan baiandama Andrei Chebotarevtiń prezidenttik reformalardy iske asyrýdy monitoringileý men baǵalaýǵa arnalǵan úshinshi taldamalyq materialy ekenin atap ótken jón.
