Almatyda júrgizýshi kýáligi joq azamat politseilerden qashyp qutylmaq boldy, dep habarlaidy "Ult aqparat".
Áleýmettik jelide bir kóshede birneshe patrýldik kólik turǵan video jariialandy. Kýágerlerdiń aitýynsha munda shamamen 20-ǵa jýyq mashina kelgen.
Qalalyq Politsiia departamentiniń ókilderi búgin tańerteń ál-Farabi dańǵyly men Ǵ.Mustafin kóshesiniń qiylysynda «Mercedes» kóliginiń júrgizýshi qatty jyldamdyqpen qaýipti manevrler jasaǵanyn aitty.
«Júrgizýshi politsiia qyzmetkerleriniń kólikti toqtatý jónindegi eskertýin elemei, kerisinshe, jyldamdyqty qosa túsken. Osyǵan bailanystyń onyń sońyna birneshe politsiia kóligi túsip, kólikti qorshaýǵa alyp, onyń odan ári qozǵalysyna jol bermedi. Rýlde 1992 jyly týǵan azamat boldy. 2020 jyly qyrkúiekte mas kúiinde kólik júrgizgeni úshin sot júrgizýshi kýáliginen bir jarym jylǵa aiyrǵany belgili boldy. Búgin dárigerler onyń esirtkige masań kúide bolǵanyn rastady. Atalǵan derek boiynsha QR Qylmystyq kodeksiniń 346-baby boiynsha sotqa deiingi tergeý bastaldy. Kúdikti ustalyp, ýaqytsha ustaý izoliatoryna qamaldy», - dedi Almaty qalasy IID tergeý basqarmasyyń bastyǵy Oljas Sháripov.
Sonymen qatar, jergilikti politsiia basqarmasynyń bastyǵy Manap Sattarov oǵan qatysty 15 ákimshilik hattama toltyrylǵanyn málim etti.
