Almaty politsiiasy 20 jastaǵy jigittiń kóliginen qarý tárkiledi, dep habarlaidy "Ult aqparat".
Politsiia Alataý aýdanynda «Toiota Korolla» kóligin toqtatqan.
«Tańǵy saǵat 5:00 shamasynda Dospanov kóshesinde júrgizýshiden kúdiktengen «Býran-027» ekipajy kólikti toqtatqan. Politsiiany kórgen ol sytylyp janama kóshege burylmaq bolǵan. Kólikte 19-20 jastaǵy 5 jigit bolǵan. Tintý kezinde olardan tapansha men onyń oqtary, eki myltyq tabylǵan. Jedel tergeý toby qarýdy ballistikalyq saraptamaǵa jiberdi», – dedi jergilikti politsiia qyzmetiniń patrýldik polkiniń komandiri Aitjan Álmuhanbetov.
Onyń aitýynsha, «Toiota» jolaýshylary men júrgizýshisi politsiia ýchaskesine jetkizildi.
Bul derekke qatysty QR QK 287-babymen qylmystyq is tirkeldi.
