Almatyda 2019 jyly pirotehnikany durys paidalanbaýdan 2 adam zardap shekti. Bul týraly búgin Almaty qalalyq TJD ókilderi ótkizgen brifing barysynda aityldy, dep habarlaidy "Ult aqparat".
Jyl saiyn Almatyda 31 jeltoqsannan 5 qańtarǵa deiin orta eseppen 10-20 órt bolady.
«Sońǵy 5 jylda 61 órt bolǵan, onyń 11-i pirotehnikalyq buiymdardy durys qoldanbaýdan bolǵan. Alaida jyldan jylǵa pirotehnikalyq zattardy qoldaný azaiyp keledi. 2015 jyly - 21 órt, 2016 jyly – 10 órt, 2017 jyly 14 órt, 2018 jyly – 13 órt, 2019 jyly 5 órt tirkelgen. Sońǵy eki jylda pirotehnikalyq buiymdardyń kesirinen órt bolǵan joq», - dedi TJD tótenshe jaǵdailardan bolatyn táýekelderdi azaitý jáne azamattyq qorǵanys salasyn baqylaý basqarmasynyń basshysy Aidos Núsipbaev.
Onyń aitýynsha, pirotehnika ónimderin durys qoldanbaýdan adamdar jii zardap shegedi.
«2015 jyldan bergi 4 jyl ishinde 138 adam jaraqat alǵan. Onyń ishinde 73-i - bala. Bir aita keterligi, jyldan jylǵa jaraqat alǵandardyń sany azaiyp keledi. 2015 jyly - 57 adam, onyń ishinde 21 bala jaraqat alǵan. Biyl qańtar aiynda 2 adam jaraqat aldy. Onyń biri – kámelet jasyna tolmaǵan bala», - dedi Aidos Núsipbaev.
Almaty qalalyq jedel járdem stansasynyń mamany adamdardyń kóbinese qandai jaraqatpen túsetinin aitty.
«Kóbinese adamdardy kúiik shalady. Halyq arasynda 1-2 dárejeli kúiikpen jii túsedi. Kóp jaǵdaida adamnyń beti, qol-aiaǵy, kózi jaraqattanady. Balalarǵa 12 jasqa deiin pirotehnikalyq zattardy qoldanýǵa bolmaidy. Mindetti túrde qasynda eresek adam bolýy kerek», - dedi jedel járdem stansasynyń dárigeri Ásel Halilova.
