Almatyda barlyq vaktsina pýnktinde Pfizer vaktsinasyn saqtaýǵa arnalǵan jabdyqtar bar. Bul týraly qalalyq qoǵamdyq densaýlyq saqtaý basqarmasynyń basshysy Nariman Tabynbaev aitty, dep habarlaidy QazAqparat.
«Almatyda koronavirýsqa qarsy Pfizer vaktsinasy qaladaǵy barlyq vaktsina pýnktine jetkiziledi. Keshe Pfizer vaktsinasyn qoldaný boiynsha naqty aqparat aldyq. Qazir bizde 137 vaktsina pýnkti jumys istep tur, sol jerdiń barlyǵynda Pfizer vaktsinasyn saldyrýǵa bolady. Bul vaktsinany birinshi kezeńde saldyra alatyn úkimet bekitken adamdardyń úsh toby bar ekenin bilemiz. Olar: 12-18 jasqa deiingi balalar, júkti áielder jáne emshektegi balasy bar áielder. Almaty boiynsha qazir vaktsinany mamandardy úige nemese mektepke shaqyryp saldyrýǵa bolady», - dedi basqarma basshysy.
Onyń aitýynsha, qazir qalada vaktsina saldyrýǵa jatatyn 176 600 bala men emshektegi balasy bar 67 myń áiel jáne 20,5 myń júkti kelinshek bar.
«Bizde osyndai tizim bar, alaida vaktsina adamdardyń óz erki boiynsha salynady. Sondai-aq ata-analardyń ruqsaty bolýy kerek. Dál qazir qansha adamnyń qai vaktsina pýnktinde vaktsina saldyratynyn, mamandardyń qai mektepke baryp vaktsina salatynyn bilmeimiz. Bul niet bildirgen adamdarǵa bailanysty belgili bolady», - dedi ol.
Megapoliste ornalasqan barlyq vaktsina pýnktinde Pfizer vaktsinasyn saqtaýǵa arnalǵan jabdyqtar bar.
