Almaty qalalyq Politsiia departamenti bastyǵynyń orynbasary Rýstam Ábdirahmanov turǵyndardy internet-alaiaqtardan saq bolýǵa shaqyrdy, dep habarlaidy QazAqparat.
«Qylmyskerler mynandai shemamen áreket etedi: olar uialy telefonǵa qońyraý shalyp, ózin politsiia qyzmetkerimin dep tanystyrady. Sonyń ishinde meniń de atymdy ataýy múmkin. Sodan keiin sizdiń atyńyzǵa nesie almaq bolǵan alaiaqtardy ustaý úshin qazir arnaiy operatsiia júrgizilip jatqanyn eskertedi»,- dep jazdy Rýstam Ábdirahmanov óziniń telegram-kanalynda.
Rýstam Ábdirahmanovtyń aitýynsha, «jalǵan politsiia qyzmetkerleri» qazir QR Ulttyq bankimen birlesip jumys isteitinin habarlap, dál sol kezde olarmen bailanysatynyn aityp, jelide qalýdy suraidy. Bul – alaiaqtardyń taǵy bir áreketi.
«Odan keiin telefonnyń arǵy jaǵyndaǵy adam sizdiń kartańyzǵa ruqsatsyz aqsha aýdarý áreketteri júrip jatqanyn jáne aqshańyzdy saqtaý úshin bank shotyna nemese úshinshi tulǵalardyń shotyna belgili bir somany salý kerek ekenin aityp, úgitteidi»,- dep atap ótti politsiia ókili.
Almaty qalalyq politsiia departamenti bastyǵynyń orynbasary politsiia qyzmetkerleri eshqashan telefon arqyly arnaiy operatsiialar men tergeý áreketterin júrgizbeitinin eskertti.
«Mundai jaǵdailarda telefonmen sóilesýdi toqtatyp, bank kartasynda nemese bank saitynda kórsetilgen senimdi nómirge qaita qońyraý shalý kerek. Qandai jaǵdai bolmasyn bank kartańyzdyń derekterin, sonymen qatar jeke basyńyzǵa qatysty málimetterińizdi eshkimge aitpańyz, jibermeńiz», – dedi Rýstam Ábdirahmanov.
