Almatyda qalalyq ákimdik pen Tilderdi damytý basqarmasynyń uiytqy bolýymen ózge ult ókilderi arasynda qalaaralyq Abai oqýlary ótti.
Qaladaǵy Qazaq qatynas joldary ýniversitetiniń májilis zalynda ótken biylǵy baiqaýda 18-25 jas aralyǵyndaǵy jiyrma bir ulttyń ókili baq synady.
Memleket basshysynyń «Rýhani jańǵyrý» baǵdarlamasynyń aiasynda uiymdastyrylǵan biylǵy baiqaý úsh kezeń boiynsha ótti. «Óleń sózdiń patshasy» dep atalǵan alǵashqy kezeńde qatysýshylar Abaidyń bilim, ǵylym jáne óner taqyryptaryna órilgen poeziialyq shyǵarmalaryn nemese qara sózderin naqyshyna keltirip jatqa oqý arqyly synǵa tústi. Al, «Qazaqta qara óleńge des bermedim» degen atpen ótken ekinshi kezeńde Muhtar Áýezovtiń áigili «Abai joly» romanynan úzindi oqydy. «Qulaqtan kirip boidy alar» kezeńinde qatysýshylar Abai ánderin áýelete oryndap, kópshiliktiń rizashylyǵyna bólendi.
Uiymdastyrýshylar úmitkerlerdiń ónerin baǵalaý kezinde olardyń kórkem mátindi tańdaý talǵamyna, óleń oqý sheberligine, qazaq tiliniń orfoepiialyq normalaryn saqtap sóileýine, án oryndaý naqyshyna, sahnalyq óner kórsetý mádenietine jáne qazaqtyń ulttyq kiim úlgisine basa nazar aýdarylǵanyn aitty. Halyqaralyq Abai qorynyń direktory Jumabek Ashýuly, M.Áýezov atyndaǵy óner institýtynyń «Abai jáne jańa dáýir ádebieti» bóliminiń meńgerýshisi Qorabai Serikqazy, «Almaty aqshamy» gazeti redaktorynyń orynbasary Áýelbek Ánýarbek baiqaýǵa qazylyq etti.
Baiqaý qorytyndysyna sáikes QazMQPÝ, filologiia fakýltetiniń 2 kýrs stýdenti Týrsýnoi Ýlýgqyzy júzden júirik dep tanylyp birinshi oryndy enshiledi. Halyqaralyq qazaq-qytai til kolledjiniń shákirti Liýbomila Moiseenko ekinshi oryn iegeri atansa, júldeli úshinshi oryn QazMQPÝ stýdenti Tahmina Iýsýpjanovaǵa buiyrdy. Jeńimpazdar men júldegerler arnaiy diplomdar, sondai-aq baǵaly syilyqtarmen marapattaldy.
– Baiqaýdyń basty maqsaty qazaq tiliniń qoldanylýyn damytý arqyly memlekettik til saiasatyn nasihattaý. Abai shyǵarmashylyǵyn nasihattaý men qoǵamdyq kelisim men qazaqstandyq rýhani birlikti nyǵaitý jáne otansúigishtik sezimge tárbieleý, kópshiliktiń qazaqtyń ulttyq mádenieti men ónerine, ádebieti men tiline degen yqylasyn arttyrý, jastar arasynda kitap oqý mádenietin damytý. Baiqaýǵa qatysqan ózge ult ókilderiniń qazaq tiline degen qurmeti men Abai shyǵarmashylyǵyna degen súiispenshilikteri kóńil qýantady, – deidi Tilderdi damytý basqarmasynyń bólim basshysy Baqyt Qalymbet.
Arman OKTIaBR
.jpeg)