Almatynyń qurylys alańdarynda ózbekstandyq 20 gastarbaiter zańsyz eńbek etken, dep habarlaidy QazAqparat.
Zańsyz immigranttar Almatyda «Kelimsek» respýblikalyq jedel-aldyn alý sharasy barysynda anyqtaldy.
Almaty qalasy politsiia departamentiniń kóshi-qon qyzmeti basqarmasynyń bastyǵy Ashat Býtýnchinovtyń aitýynsha, gastarbaiterler Bostandyq aýdanynda ornalasqan turǵyn úi kesheniniń aýmaǵynda jumys istegen.
«Olar jumys berýshiler sekildi elimizdiń qoldanystaǵy kóshi-qon zańnamasyn buzdy. Sol úshin ákimshilik jaýapkershilikke tartylyp, PD qabyldaý-taratý ornyna qamaldy. Keiinnen sot sheshimi boiynsha gastarbaiterler Qazaqstannan tys jerge shyǵarylady»,- dep málimdedi ol.
Sondai-aq, spiker úsh kún ishinde anyqtalǵan quqyq buzýshylyqtar statistikasyn atap ótti.
«Kóshi-qon zańnamasyn buzǵany úshin 921 adam ákimshilik jaýapkershilikke tartyldy, onyń 686 - Qazaqstanda júrip-turý qaǵidalaryn buzǵan sheteldik azamattar. Sot sheshimi boiynsha 25 sheteldik QR aýmaǵynan shyǵaryldy. Sheteldikterdiń Qazaqstan Respýblikasynda bolý zańdylyǵyn qamtamasyz etý jónindegi sharalardy qabyldamaǵany úshin 211 tulǵa, Qazaqstan Respýblikasyna sheteldik jumys kúshin tartý erejelerin buzǵany úshin 24 jumys berýshi jaýapkershilikke tartyldy», - dedi Ashat Býtýnchinov.
Aita keteiik, «Kelimsek» respýblikalyq jedel aldyn alý sharasy qoǵamdyq tártipti saqtaý jáne sheteldikterdiń Qazaqstanda júrip-turý erejelerin buzýyn anyqtaý maqsatynda ótkiziledi.
