Almatyda 5-synyp oqýshysyn urdy dep aiyptalǵan dene shynyqtyrý pániniń muǵalimi jumystan ketti, dep habarlaidy QazAqparat.
Buqaralyq aqparat quraldarynyń birinde Almatydaǵy №85 orta mektep oqýshysy dene shynyqtyrý sabaǵynan keiin aýrýhanaǵa túskeni, balanyń anasy muǵalimdi urdy dep aiyptaǵany týraly aqparat tarady. Atalǵan bilim mekemesiniń direktory Ninel Erkebaeva oqiǵaǵa qatysty pikir bildirip, ustaz jaily aityp berdi.
«Taraǵan aqparattyń videosy bar. Ol jerde eshqandai qol kóterý joq. Biraq oqýshynyń anasy onyń qatty taiaq jegenin jáne miy shaiqalǵanyn aitady. Bala qazir aýrýhanada. Bizdiń sport zalda beinebaqylaý ornatylǵan, osy beinejazba arqyly muǵalimniń oqýshyny urmaǵanyn dáleldep otyrmyz», - deidi mektep direktory.
Direktor dúisenbi kúni muǵalimniń óz erkimen jumystan ketkenin aitty.
«Dene shynyqtyrý pániniń muǵalimi bizde 21 jyl jumys istedi, gandbol sektsiiasynyń jetekshisi boldy. Onyń jetekshiligimen qyzdarymyz gandboldan respýblikalyq jarystarda birneshe ret birinshi oryndy ielense, byltyr úshinshi oryn aldy. Qazir bizde dene shynyqtyrý pániniń alty muǵalimi bar», - dedi Ninel Erkebaeva.
Qalalyq bilim berý basqarmasy tekserý júrgizilip jatqanyn málim etti.
«Bilim basqarmasynda tekserý komissiiasy quryldy. Qazir jaǵdaidy anyqtap jatyr. Onyń nátijeleri boiynsha tiisti sharalary qabyldanatyn bolady. Nátijeleri týraly tekserý aiaqtalǵannan keiin qosymsha habarlaityn bolamyz», - dep jaýap berdi bilim basqarmasynan.
