Almatyda provizorlyq ortalyqqa ókpesiniń 64 paiyzy qabynyp túsken 87 jastaǵy ájei jazylyp shyqty, dep habarlaidy QazAqparat.
Bul týraly onlain-brifing kezinde Psihikalyq saýyqtyrý ortalyǵynyń direktory Sapar Rahmensheev málimdedi.
Onyń aitýynsha, Psihikalyq saýyqtyrý ortalyǵynyń M. Maqataev kóshesindegi filialy pandemiiaǵa bailanysty provizorlyq ortalyqqa ainalyp jumys jasaýda. Osydan eki-úsh apta buryn munda kúnine 20-25 naýqas túsken bolsa, qazir orta eseppen 8-10 adamǵa azaidy.
«Psihikalyq saýyqtyrý ortalyǵynyń M. Maqataev kóshesindegi filialy 5 naýryzdan bastap provizorlyq ortalyqqa ainalyp, qyzmet jasap keledi. Shetelden ushyp kelgen 1800 azamattyń barlyǵy osy ortalyqta boldy. Onyń 152-nen infektsiia anyqtalyp, olardy juqpaly aýrýlar aýrýhanasyna aýystyrdyq. Birinshi shildeden bastap bizdiń ortalyqta 350 provizorlyq tósek jasaldy. Iaǵni M. Maqataev kóshesindegi ortalyqta 180 tósek bolsa, Á. Kekilbaev kóshesinde - 170», – dedi spiker.
Provizorlyq ortalyqta 296 meditsina qyzmetkeri jumys jasaidy.
«Ókpesi qabynǵan naýqastarǵa sapaly meditsinalyq kómek kórsetiledi. Syrqattarǵa qabynýǵa, bakteriiaǵa qarsy, sondai-aq antikoogýliantti terapiia jáne oksigenoterapiia qoldanylady. Bul emniń bári Densaýlyq saqtaý ministrliginiń bekitken hattamasy boiynsha júrgizilýde. Bizdiń ortalyqta 10 reanimatsiialyq tósek jáne 6 IVL apparaty bar. Jyl sońyna deiin taǵy 4 IVL apparatyn alamyz dep josparlap otyrmyz», – dedi ortalyq basshysy.
Osy aidyń basynan atalǵan provizorlyq ortalyqtan 499 adam em alyp, jazylyp shyqqan. Onyń ishinde 87 jastaǵy ájei de bar.
«1933 jyly týǵan apamyz bizdiń aýrýhanaǵa túsip, 18 kún jatyp, em qabyldady. Bes kún reanimatsiiada jatty. KT rentgeni arqyly ókpesiniń 64 paiyzy qabynǵany anyqtaldy. Ol kisi tiisti emniń arqasynda on segiz kúnniń ishinde saýyǵyp shyqty», – deidi Sapar Rahmensheev.
Aita ketsek, provizorlyq ortalyq ashylǵaly beri jasy 55-ten joǵary 207 naýqas emdelgen. Onyń 152-si jazylyp shyqsa, qalǵandary em qabyldap jatyr. Búginde Maqataev kóshesindegi provizorlyq ortalyqta 103 adam, al Á.Kekilbaev kóshesindegi ortalyqta 125 naýqas em alýda. Iaǵni burynǵydai emes naýqastar sany azaiǵan ári bos oryndar da bar.
Direktordyń aitýynsha, pandemiiaǵa qaramastan ortalyq óziniń tikelei mindetterin toqtatqan joq. Iaǵni dispanserlik baqylaýda turǵan psihikalyq ia bolmasa narkologiialyq aýytqýlary bar aýrýlardy ortalyqqa jatqyzyp, emdeý júrgizilýde. Psihologiialyq kómek kórsetý de toqtatylǵan joq.
