Almatylyq dárigerler ókpesi 90% zaqymdanǵan júkti áieldi aman-esen bosandyryp aldy, dep habarlaidy "Ult aqparat".
Almaty qalalyq densaýlyq saqtaý basqarmasynyń habarlaýynsha, 2 shilde kúni Almaty qalasyndaǵy №2 perzenthanaǵa 23 jastaǵy áiel júktiliktiń 38 aptasynda josparly túrde bosanýǵa kelgen.
«Ol perzenthanaǵa joǵary temperatýra, jótel jáne entigýmen tústi. Naýqasty tekserý kezinde dárigerler COVID-19, eki jaqty polisegmentarly pnevmoniia diagnozyn qoidy. Sonymen qatar, tekserý barysynda naýqastyń ókpesiniń 90% zaqymdanǵany anyqtaldy. Naýqas dereý jansaqtaý bólimine jatqyzyldy. Al, kelesi kúni onyń tolǵaǵy bastaldy. Perzenthana dárigerlerdiń komandalyq jumysy men olardyń úilesimdi áreketiniń arqasynda salmaǵy 3 keliden asatyn ul bala dúniege keldi», - dep habarlaidy Qoǵamdyq densaýlyq saqtaý basqarmasynyń baspasóz qyzmeti.
Bosanǵannan keiin Dinaranyń (naýqas) jaǵdaiy óte aýyr dep baǵalandy. Sondyqtan ol 27 kún boiy jansaqtaý bóliminde ókpeni jasandy jeldetý aparatyna qosyldy. Tek 29 shilde kúni ǵana naýqastyń jaǵdaiy jaqsaryp, beiindi bólimshege aýystyryldy.
«Aq halatty abzal jan, keremet dáriger, reanimatsiia bóliminiń jetekshisi – Gúlnur Altaiqyzy Baibolovaǵa alǵysym sheksiz jáne maman retinde ǵana emes, adam retinde joǵary baǵalaimyn. Meni osyndai dárigerge jolyqtyrǵan úshin Allaǵa rizamyn. Sondai-aq, osy №2 perzenthananyń barlyq meditsina qyzmetkerlerine naýqastarǵa úlken jaýapkershilikpen jáne qurmetpen qarap, tynymsyz eńbegine, sapaly meditsinalyq qyzmeti men qamqorlyǵy úshin alǵys aitamyn. Dárigerler maǵan ekinshi ómir syilady jáne osy kisilerdiń arqasynda áli ózim kórmegen deni saý sábi dúniege keldi. Búgin sábiimdi birinshi ret kórip, qushaǵyma basamyn», - deidi Dinara Serikbol.
Dúniege COVID-19 simptomy joq, deni saý náreste keldi. Sábidi perzenthanadan eki kúnnen keiin shyǵarǵan. Qazirgi ýaqytta ol ata-ájesiniń qolynda. Balanyń atyn Omar dep qoidy.
