KTK siýjetinen alynǵan kadr
Almatyda 7 jasar qyzdy óltirdi degen kúdikpen ógei sheshesi qamaýǵa alyndy. Marqum bolǵan Karina Zakýraevanyń jaqyndary 47 jastaǵy áieldiń búldirshindi 4 ai boiy sabap kelgenin aitady. Al, týǵan ákesi oǵan múlde arasha túspedi deidi, - dep habarlaidy KTK telearnasy.
Olardyń aitýynsha, áiel qyzdy sońǵy ret úlken dáretin jiberip qoiǵany úshin basyn qabyrǵaǵa urǵan. Qatty soqqydan miyna qan quiylyp, qaitys bolǵan. Qyzdy baǵyp-qaqqan ájesi men kórshileri endi ulyn da jazalaýdy surap otyr.
"Karina úlken dáretin jiberip qoiǵan. Sodan keiin ol áiel qyzdy vannaǵa kirgizip, basyn qabyrǵaǵa urǵan. Basy tesilip, esinen tanǵan. Sóitip, jerge búkil salmaqpen qulaǵan. Sosyn ákesine "Menińshe, óltirip qoidym" dep qońyraý shalǵan. Osyǵan deiin 4 ai boiy toqtamai uryp júrgenin keiinnen bildim", - deidi Karinanyń týysqan ápkesi Ekaterina Zakýraeva.
Qaiǵyly oqiǵa osydan 3 kún buryn Si-Sinhaia kóshesindegi úide bolǵan. Karinanyń ákesi bul jerge qyrkúiek aiynda kóship kelgen. Al qazirgi áielimen birge sonyń úiinde 6 ai turyp, 7 jasar qyzyn naýryzda ákeledi. Kórshileri ógei sheshesimen qosa, týǵan ákesiniń de qyzdy uryp júrgenin kóripti.
"Meniń balkonymnan olardyń terezesi kórinetin. Ákesi kishkentai qyzǵa belbeýmen umtyldy. Sodan keiin Baljan degen áiel jetkinshektiń moinynan ustap, bólmege laqtyryp jiberdi. Baiqus qyz ushyp ketti. Keiin men kishkentai Karinany aýladan kórdim. Jaqyndap, úńilip qarasam, qabaǵy jarylyp, qoldary kesilgen, moinynda eresek adamnyń alaqanynyń izi turdy. Ózinen ne boldy dep surasam "Aýladaǵy bala qylqyndyrdy" dep aitady", - deidi kórshisi Olga Bernikova.
Týystarynyń aitýynsha, Karinanyń ákesi ishimdik ishedi. Qyz birinshi áielinen. 10 ailyǵyna jetkende týǵan sheshesi qashyp ketipti. Sodan beri habar joq. Anasyz qalǵan náresteni ájesi qolyna alyp, 7 jasyna deiin baqqan. Alaida osydan 4 ai buryn ákesi inspektorlarmen kelip, qyzyn alyp ketti deidi.
"Ógei sheshesi 4 ai boiy uryp júrgen. Al ákesi oǵan múlde mán bermegen. Ózi de urypty. Olar menen nemeremdi tyǵyp júrdi. Men politseilerge aryz jazǵanmyn. Biraq eshkim qabyldamady. Prokýratýraǵa da bardym. Túk shyqpady", - deidi Karinanyń ájesi Elena Zakýraeva.
Sóitse qyzdyń ákesi Elena Zakýraevanyń týǵan balasy da emes eken. Ony da 2 ailyǵynan asyrap alypty. Qazir ol jaldamaly jumysshy. Naqtyraq - santehnik, elektrik.
"Aýlada jumys istep júrgen kezde ol maǵan habarlasyp, "Qyzdy óltirip qoiǵan siiaqtymyn" dedi. Úige kelip, dárigerlerdi shaqyrdyq. Negizi azamattyq nekedegi áielim qyzymdy jii uratyn. Men jumysqa ketken kezde qyzym úlken dáretin jiberip qoisa uratyn. Birneshe ret qyzym ekeýimiz dalada da túnegenbiz. Ózinen "Ne úshin urasyń" dep surasam "Endi tiispeimin" dep aitatyn", - deidi Karinanyń ákesi Báken Zakýraev.
Politseiler 1976 jyly týǵan áieldi ustady. Oǵan qatysty "Adam óltirý" baby boiynsha is qozǵaldy.
"Almaty politsiia departamenti Bostandyq aýdandyq politsiia basqarmasy qylmystyq is QR Qylmystyq kodeksiniń 99-baby 3-bóligi boiynsha tergelip jatqanyn habarlaidy. Kúdikti - 1976 jyly týǵan T. esimdi azamatsha ustaldy jáne qamaýǵa alyndy. Tergeý jalǵasyp jatyr", - deidi Almaty politsiia departamentiniń resmi ókili Saltanat Ázirbek.
Bul jantúrshigerlik jait týraly jýrnalist Mihail Kozachkov ta óziniń Telegram arnasynda habarlady. Onyń jazýynsha, qyzdyń ólimine kúdikti - 47 jastaǵy qoǵam belsendisi Baljan Turlybek. Qaza tapqan búldirshin odan shamamen 15 jas kishi joldasynyń (aýla sypyrýshy) birinshi nekesinen týǵan qyzy bolǵan.
